ठाणे : एकीकडे मुसळधार पाऊस कोसळत असताना शनिवारी मध्यरात्री २ वाजता ठाण्यातील उथळसर येथील नाल्यात उडी घेणारा जीवन ओहाळ (३०) या तरुणाचा मृतदेह गुरुवारी दुपारी तब्बल चार दिवसांनी विटावा खाडीमध्ये सापडला. त्याचा मृतदेह विच्छेदनासाठी ठाणे जिल्हा शासकीय रुग्णालयात पाठविण्यात आला आहे. तत्पूर्वी मुंब्र्यातील खाडीत उडी घेणाऱ्या तरुणाचा मृतदेह चार दिवसांनी मिळाला होता. मागील ८ दिवसांतील अशाप्रकारची ही दुसरी घटना आहे.
शनिवारी मध्यरात्री २ वाजण्याच्या सुमारास उथळसर येथील नाल्यात त्याच परिसरात राहणाऱ्या जीवन या तरुणाने उडी घेतली होती. सलग चार दिवस ठाणे आपत्ती व्यवस्थापन आणि अग्निशमन विभागामार्फत त्याचा शोध साकेत, कळवा आणि विटावा येथील खाडी परिसरात सुरू होता. अखेर गुरुवारी त्याचा मृतदेह विटावा खाडी येथील गणेश विसर्जन घाटाजवळ टीडीआरएफ पथकाला सापडला.