डोंबिवली : डोंबिवलीतील प्रोबेस कंपनीत महिन्याभरापूर्वी झालेल्या भीषण स्फोटातील मृतांच्या कुटुंबीयांना प्रत्येकी दोन लाख रुपयांची मदत देण्याचा व जखमींवरील वैद्यकीय उपचाराचा खर्च जिल्हाधिकाऱ्यांमार्फत लगेच देण्याचा निर्णय मुख्यमंत्री देवेंद्र फडणवीस यांनी टिष्ट्वट करून जाहीर केला. ‘लोकमत’ने डोंबिवलीत शुक्रवारी ‘लोकमत आपल्या दारी’ या उपक्रमात त्याच स्फोटातील मृत व जखमींना अद्याप मदत मिळाली नसल्याचा मुद्दा लावून धरला होता. त्याचवेळी मुख्यमंत्र्यांनी टिष्ट्वट केल्याची माहिती भाजपा आमदार रवींद्र चव्हाण यांनी दिली आणि दुर्घटनाग्रस्तांना दिलासा मिळाला.स्फोटातील मृतांचे नातलग मदतीपासून वंचित असल्याचे वृत्त ‘लोकमत’ने शुक्रवारच्या ‘हॅलो’मध्ये ठळकपणे प्रसिद्ध केले. डोंबिवलीतील ‘बालभवन’मध्ये ‘लोकमत आपल्या दारी’ या कार्यक्रमात ‘डोंबिवलीतील स्फोट : महिन्याभरानंतर...’ या विषयावर परिसंवादाचे आयोजन केले होते. यावेळी स्फोटात मृत्युमुखी पडलेल्या सुशांत कांबळे यांची पत्नी सोनल हजर होत्या. आपल्या दीड वर्षांच्या मुलाच्या पालनपोषणाचा प्रश्न कसा आ वासून उभा आहे, ही व्यथा त्यांनी साश्रू नयनांनी मांडताच उपस्थित हेलावले. मृतांचे नातलग, जखमी आणि नुकसानग्रस्तांना भरपाई मिळाली पाहिजे, अशी आग्रही मागणी उपस्थितांनी केली. त्याचवेळी चव्हाण यांनी मुख्यमंत्र्यांच्या टिष्ट्वटची माहिती देताच उपस्थितांनी टाळ््यांचा कडकडाट केला.यावेळी भाजपा आमदार रवींद्र चव्हाण, महापौर राजेंद्र देवळेकर, ‘वनशक्ती’चे अश्वीन अघोर, एमआयडीसीचे कार्यकारी अभियंता सुुभाष तुपे, ‘कामा’ संघटनेचे प्रतिनिधी व उद्योजक एन. व्ही. भागवत, सभागृह नेते राजेश मोरे, वास्तूविशारद राजीव तायशेट्टये, जागरुक नागरिक राजू नलावडे, ‘लोकमत’चे उप सरव्यवस्थापक राघवेंद्र शेट आदी मान्यवर उपस्थित होते. सुरुवातीला स्फोटातील मृतांना श्रद्धांजली अर्पण करण्यात आली.अशा घटनांची पुनरावृत्ती होऊ नये याकरिता कोणत्या उपाययोजना करता येतील याची चर्चा यावेळी झाली. श्रोत्यांनी एमआयडीसीचे अधिकारी, उद्योजक, आमदार, महापौरांना विविध विषयांवर थेट सवाल केले. चर्चेचे सूत्रसंचालन ‘लोकमत’चे वरिष्ठ सहाय्यक संपादक संदीप प्रधान यांनी केले. (सविस्तर वृत्त उद्याच्या अंकात)
मृतांच्या नातलगांना २ लाखांची मदत जाहीर
By admin | Updated: June 25, 2016 01:43 IST