शहापुरात पावसाच्या पाण्यात अडकलेल्या ९ जणांची केली सुटका

शहापूर - गेल्या दोन दिवसांपासून सुरू असलेल्या मुसळधार पावसामुळे शहापुरात जनजीवन विस्कळीत झाले आहे. बुधवारी रात्री झालेल्या पावसामुळे परांजपेनगर येथील माजी आमदार पांडुरंग बरोरा यांच्या घरासमोरील मैदानात असलेल्या घराला पाण्याने चारी बाजूने वेढा दिला. घरात राहणारी तीन मुले आणि पती-पत्नी असे पाचजण जीव वाचविण्याच्या आकांताने टाहो फोडत होते. त्या आवाजाने माजी आमदार बरोरा बाहेर आले. पाण्यात अडकलेले बॅटरीच्या साहाय्याने मदतीसाठी इशारा करत असल्याचे दिसले. माजी आमदार बरोरा यांनी तात्काळ पोलीस प्रशासन आणि आपत्ती व्यवस्थापन यांना कळवून स्थानिकांच्या मदतीने त्यांची सुटका केली. तर दुसरीकडे गोठेघर गावात पाणी शिरल्याने तेथे काही रहिवासी अडकल्याचा फोन येताच तहसीलदार नीलिमा सूर्यवंशी, नायब तहसीलदार, तलाठी आदींनी गोठेघर येथे धाव घेतली. रात्री दोनच्यासुमारास तेथे अडकलेल्या राजेश डिंगोरे, मनीष डिंगोरे, काशिनाथ फर्डे व त्यांची पत्नी अशा चारजणांची जीवनरक्षक शहापूर टीमने सुटका केली. समीर चौधरी व रवींद्र मडके, अतिष अधिकारी व त्यांचा मित्र परिवार यांच्या साहाय्याने अडकलेल्यांची सुखरूप सुटका केली.