सोलापूर : होटगी रोड येथील एका महिलेच्या अंगात एक वर्षापूर्वी मृत झालेल्या व्यक्तीचा आत्मा अंगात येत होता. याची माहिती अंधश्रद्धा निर्मूलन समितीला मिळाली. त्यांनी तिथे जाऊन त्यांचे समुपदेशन केले. त्या महिलेच्या मनातील भीती व अंधश्रद्धा दूर केली.
होटगी रोड परिसरातील एका महिलेच्या अंगात एक वर्षापूर्वी मृत झालेले रवींद्र पाटील यांचा आत्मा येतो. हा आत्मा इतरांशी संवाद साधतो अशी चुकीची माहिती आजूबाजूला पसरली. पाटील कुटुंबीयांच्या अंगणात कुंकू लावून कापलेला लिंबू कोणीतरी टाकला. मृत व्यक्तीची पत्नी मीरा पाटील, मुलगी वैष्णवी पाटील, मुलगा वैभव पाटील हे कुटुंब हे या घटनेने अस्वस्थ झाले. पाटील कुटुंबियांनी अंनिसशी संपर्क साधला.
पाटील कुटुंब गेल्या नऊ वर्षापासून तेथे राहत असून या कुटुंबा संदर्भात सर्व माहिती अंगात आत्मा येणाऱ्या महिलेस होती. त्यांच्या सांगण्यानुसार मृत रवींद्र पाटील यांचा आत्मा तिच्या शरीरात येऊन संवाद साधत असे. अंनिसकडून समुपदेशन झाल्यानंतर अंगात येणाऱ्या महिलेला आपली चूक समजली. आपण आजारी असल्याने बडबड करत असावे, असे त्या महिलेने सांगितले.