सोलापूर : उत्तर सोलापूर तालुक्यात घरगुती व लघु उद्योगाचे १२५ वीज कनेक्शन तोडण्यात आले असून रविवारी शेतीपंपाची वीज तासाभरातच गुल्ल करण्यात आली. तासभरच वीज पुरवठा राहिल्याने शेतकऱ्यांचे नुकसान झाले. दरम्यान तालुक्यातील १३६ शेतकऱ्यांनी ५० टक्के रक्कम भरली असल्याचे सांगण्यात आले.
औद्योगिक, घरगुती, शेतीपंप आदींची उत्तर सोलापूर तालुक्यात मोठ्या प्रमाणावर थकबाकी आहे. मागील वर्षी एप्रिल महिन्यापासून वीज बिल भरण्यासाठी कोणीही पुढे येत नसल्याने थकबाकीचा आकडा वरचेवर वाढत आहे. थकबाकी भरण्याचे आवाहन करीत शासनाने शेतीपंपाच्या बिलात ५० टक्के सवलत दिली आहे. मात्र, घरगुती व शेतीपंपाची थकबाकी भरण्यासाठी ग्राहक शेतकरी पुढे येत नसल्याचे दिसत आहे. बिल भरत नसल्याने सुमारे १२५ घरगुती व लघु उद्योगाचे कनेक्शन बंद करण्यात आल्याचे उत्तर सोलापूर तालुका वीज मंडळाचे उपअभियंता संतोष कैरमकोंडा यांनी सांगितले.
शेतीपंपाच्या थकबाकीवर ५० टक्के सवलत देण्यात आली आहे. त्याचा फायदा उत्तर सोलापूर तालुक्यातील १३६ शेतकऱ्यांनी घेतला आहे. या शेतकऱ्यांनी ५० टक्क्यांप्रमाणे रक्कम भरल्याने त्यांना तसे प्रमाणापत्रही देण्यात आले आहे. तालुक्यातील १३ हजार शेतकऱ्यांकडे १०४ कोटी चार लाख ८४५ रुपये इतकी थकबाकी असून यापैकी ५० टक्के रक्कम शेतकऱ्यांनी भरावयाची आहे. ती भरली जात नसल्याने शेतीपंपाचे ट्रान्सफॉर्मर रविवारी एक तासासाठी कार्यान्वित करण्यात आले. तासभर थ्रिफेज वीज पुरवठा सुरू राहिल्याने पिकांना पाणी देता आले नाही. शिवाय ग्रामपंचायतीच्या पाणी पुरवठा विहिरीचेही पाणी पुरवठा टाकीत पडले नाही. त्यामुळे गावोगावच्या पाणी पुरवठ्यावर परिणाम होणार आहे.
---
शेतकऱ्यांना अजब आवाहन
कारंबा उपकेंद्रांतर्गत १० गावे असून या गावातील शेतकऱ्यांकडे मोठ्या प्रमाणावर थकबाकी आहे. वीज मंडळाची यंत्रणा शेतकऱ्यांना पोहोचली नाही. मात्र, सोशल मीडियाच्या माध्यमातून शेतकऱ्यांनी चार हजार रुपये भरावेत, असे आवाहन केले आहे. शासन ५० टक्के वीज बिल भरून थकबाकीमुक्त होण्याचे आवाहन करीत असताना कारंबा उपकेंद्राने चार हजार रुपये भरण्याचे अजब आवाहन केले आहे.