मोहोळ : दोन मोटारसायकलींची समोरासमोर धडक होऊन झालेल्या अपघातात दोघा तरुणांचा मृत्यू झाला, तर एक जण गंभीर जखमी झाला. हा अपघात गुरुवारी (दि. २४) सकाळी ११.३० वाजता मोहोळ तालुक्यात घाटणे गावाजवळ झाला.
मोहोळ पोलिसांच्या माहितीनुसार तायप्पा निवृत्ती साठे (वय ३२) व विशाल पंडित गवळी (वय १६, दोघे रा. मलिकपेठ, ता. मोहोळ) दोघे मोहोळहून मलिकपेठकडे दुचाकीने (क्र. एमएच ४५ एसी १५०५) निघाले होते. घाटणे फाट्याजवळ येताच समोरून आलेल्या मोटारसायकलने (क्र. एमएच १३ बीडी ४३४८) साठे यांच्या मोटारसायकलला जोरात धडक दिली.
या अपघातात दुसऱ्या मोटारसायकलवरील बाबासाहेब सत्यवान चव्हाण (रा. भोयरे, ता. मोहोळ) हे गंभीर जखमी झाले. त्यांना मोहोळ येथील शासकीय रुग्णालयात दाखल करत असताना उपचारापूर्वीच त्यांचा मृत्यू झाला, तर तायप्पा साठे हे जागीच ठार झाला. साठे यांच्या पाठीमागे बसलेला विशाल गवळी हा गंभीर जखमी झाला असून, शासकीय रुग्णालयात प्रथमोपचार करून त्याला पुढील उपचारासाठी सोलापूर येथील शासकीय रुग्णालयात हलवले आहे.
दोन्ही गावांवर शोककळा
वटपौर्णिमेच्या दिवशी झालेल्या या अपघातानंतर मलिकपेठ व भोयरे या दोन गावांवर शोककळा पसरली आहे. मलिकपेठचे उपसरपंच गणेश जगताप यांनी मोहोळ पोलीस ठाण्यात या घटनेची खबर दिली. अधिक तपास अपघात पथकाचे पोलीस हवालदार अविनाश शिंदे करत आहेत.
----
२४मोहोळ ॲक्सिडेंट
२४तायप्पा साठे, २४ विशाल गवळी