बार्शी : कुर्डुवाडी-बार्शी रस्त्यावर छोटा हत्ती आणि ट्रक यांच्यात समोरासमोर धडक होऊन चालकासह दोघे जण जागीच ठार झाले. या अपघातात नऊ जण जखमी झाले असून, त्यांना उपचारास रुग्णालयात दाखल करण्यात आले आहे.
छोटा हत्ती चालक आशिष अजित सातारकर (रा. जामगाव रोड, बार्शी) आणि त्याचा साथीदार गणेश हरी काळे (रा. लातूर) असे जागीच मरण पावलेल्या दोघांची नावे असून, सोमवारी सायंकाळी सहाच्या सुमारास बार्शी-कुर्डुवाडी रोडवर पराग हॉटेलजवळ हा अपघात झाला.
याप्रकरणी पोलिसांनी ट्रक (एम.एच.०६,एच.२६२३)चा चालक आश्रप्पा अच्युत माळी (रा. मुरुड जि. लातूर) याच्याविरुद्ध गुन्हा दाखल केला असून, प्रताप नवनाथ जगताप (रा. वांगरवाडी) यांनी रात्री उशिरा फिर्याद दिली.
पोलीस सूत्राकडील माहितीनुसार अपघातातील छोटा हत्ती वाहन हे कुर्डुवाडीहून बार्शीकडे येत होते. इतक्यात लातूरहून पुण्याकडे जाणाऱ्या भरधाव वेगातील ट्रकची जबर धडक बसली. अपघातातील दोन्हीही वाहने रस्त्याच्याकडेला जाऊन कलंडली. छोटा हत्तीची समोरची बाजू पूर्ण चेंदामेंदा झाली. अपघातात चालक व दुसरा सहकारी जागीच मरण पावला.
दरम्यान फिर्यादी प्रताप जगताप हे गावकडे निघाले होते. हा अपघात पाहून त्यांनी तालुका पोलिसांना याची माहिती दिली. यानंतर सहायक पोलीस निरीक्षक शिवाजी जायपत्रे, पोसइ प्रवीण जाधव, पोलीस हवालदार जनार्धन सिरसाट, कॉन्स्टेबल बोदर, विजय घाटे, वैभव भांगे यांचे पथक अपघातस्थळी धावून आले.
---
जखमींवर उपचार
या अपघातात छोटा हत्ती(एम.एच. १४,जी.डी.६४३३)तून निघालेले पूनम पवार, रवी पवार, रंजना रवी पवार, कोमल पवार, नीलम पवार, मनीषा पवार, अमोल बबन पवार, अमोल पवार, अमोल पवार (सर्व रा. सोलापूर रोड, बार्शी) असे नऊ जण जण जखमी झाले. त्यांना तातडीने खासगी दवाखान्यात दाखल केले.
---
फोटो : ०१ बार्शी ॲक्सिडेंट