दिंडीत कार घुसून दोन ठार

आढीव विसावा येथील घटना

पंढरपूर : टेम्पो व कारची समोरासमोर धडक झाल्याने कार विरूद्ध दिशेने फिरून अमरावतीच्या पायी दिंडीत घुसल्याने दोघे जागेवरच ठार झाले तर दहा जखमी झाले. यातील चौघे गंभीर आहेत. गुरूवारी रात्री सव्वादहाच्या सुमारास आढीव विसाव्याजवळ पंढरपूर येथे ही घटना घडली. मृतांमध्ये एक महिला व एक पुरूष वारकऱ्याचा समावेश आहे. सोलापूरहून कुर्डूवाडीकडे निघालेल्या टेम्पो (क्र. एम. एच. १३/ ए. एन. ३६८) व कार (क्र. एम. एच. २५/आर. १५४२) ची समोरासमोर धडक झाली.दरम्यान, पायी चालत येणाऱ्या अमरावतीच्या दिंडीमध्ये कार घुसल्याने उमेश मारूतराव बावनखडे (वय २६) व इंदूबाई धोत्रे (वय ५0) हे दोघे जागीच ठार झाले तर अन्य दहा जखमी झाले आहेत. घटना घडताच उपविभागीय पोलीस अधिकारी प्रशांत कदम फौजफाट्यासह घटनास्थळी धाव घेऊन मदत केली व जखमींना उपचारासाठी पंढरपूरच्या उपजिल्हा रूग्णालयात दाखल केले. जखमींमध्ये श्रीराम नारायण दुर्गे (वय २४, खारतडेगाव), पद्माकर विनोदराव दसरे (वय २७, सालोरा), कमल बबनराव वायस्का (वय ४५, रघुनाथपूर), कांता किरण मुळे (वय ३५, भांबुरा), शोभा गोकुळ चव्हाण (वय ४0, पाचोड, वर्धा), पुष्पा कुंडलिकराव पाटील (मालदडा), सरूबाई सुरेशचंद्र राठोड (वय ५0, अमरावती), ललिता प्रल्हाद पोहेकर (वय ५६, जामडी, अकोला), आशा रमेशराव आखरे (मारडा, अमरावती) यांचा समावेश आहे. हे सर्वजण रूक्मिणी माता संस्था, चौंडल्यपूर (ता. तिसवा, जि. अमरावती) या दिंडीतून पंढरपूरकडे येत असताना त्यांच्यावर काळाने घाला घातला तर दहा जण जखमी झाले. यातील चौघांची प्रकृती गंभीर आहे. रात्री उशिरापर्यंत याबाबत गुन्हा दाखल झाला नव्हता.