महिलेसह दोन मुलींचा बुडून मृत्यू

आंदेवाडीवर शोककळा: कपडे धुण्यासाठी गेल्या होत्या बोरी नदीवर

दुधनी : कपडे धुण्यासाठी बोरी नदीवर गेलेल्या महिलेसह दोन शाळकरी मुलींचा पाण्यात बुडून मृत्यू झाला़ ही घटना आंदेवाडी ज़ (ता़ अक्कलकोट) येथे शुक्रवारी सकाळी ९ वाजण्याच्या सुमारास घडली़ आंदेवाडी येथील भंगारेव्वा दे़ कलमनी (वय ४५), काळम्मा ज़ कलमनी (वय १५) आणि जकव्वा चं़ कलमनी (वय १५) या कपडे धुण्यासाठी रुद्देवाडी शिवारातील नागेश देसाई यांच्या शेताजवळील बोरी नदीवर गेल्या होत्या़ कपडे धुताना भंगारेव्वा कलमनी यांचा पाय घसरुन त्या खोल डबक्यात बुडत असताना काळम्मा व जकव्वा या त्यांना वाचविण्यासाठी पाण्यात उतरल्या़ या दोघींनाही पोहता येत नसल्याने त्यांचाही पाण्यात बुडून मृत्यू झाला़ या घटनेची माहिती मल्लप्पा कलमनी यांनी दक्षिण पोलीस ठाण्यात दिली़ त्यानुसार उपविभागीय पोलीस अधिकारी अशोक जाधव, पोनि राजेंद्र शेळके यांनी घटनास्थळाला भेट देऊन पंचनामा केला़ अधिक तपास सहा़ फौजदार विकास बुद्धे, मिलिंद कांबळे, बलभीम भोसले करीत आहेत़ काळम्मा कलमनी व जकव्वा कलमनी या दोघींनी इयत्ता नववीची परीक्षा देऊन दहावी अभ्यास करीत आहेत़ त्या दोघी मातोश्री लक्ष्मीबाई म्हेत्रे प्रशालेत शिकत होत्या़ या घटनेमुळे आंदेवाडी गावात शोककळा पसरली़