सांगोला : कडब्याच्या कारणावरून सुनेने भावाला बोलावून घेत वृद्ध सासऱ्याला काठीने मारहाण करून जखमी केले.
सिद्धेश्वर प्रल्हाद मेटकरी असे जखमी वृद्धाचे नाव असून १ एप्रिल रोजी दु. ३ च्या सुमारास शिरभावी (मेटकरीवाडी, ता.सांगोला) येथे ही घटना घडली.
शिरभावी-मेटकरवाडी येथील सिद्धेश्वर मेटकरी यांचा मुलगा राजेंद्र व सून राणी हे त्यांच्याशेजारी राहतात. मुलाच्या डोक्यावर परिणाम झाल्याने २०१३ पासून त्याच्यावर औषधोपचार सुरू आहेत. १ एप्रिल रोजी सकाळी ११ च्या सुमारास मुलगा राजेंद्र याने वेडाच्या भरात चुलते शामराव यांच्या शेतातील कडबा पेटवून दिला. त्यावेळी सर्वांनी मोटारीच्या साहाय्याने आग विझवली. या घटनेनंतर शामराव यांनी स्वत:चा कडबा जळला असला तरी कमी पडल्यानंतर मागेन, असे सिद्धश्वर यांना म्हणाला. दरम्यान सून राणी हिने कडबा देणार नसल्याचे सांगत शिवीगाळ केली. यानंतर राणी हिने माहेरी फोन करून याची माहिती दिली. त्यानंतर भाऊ यशवंत भीमराव लवटे याने एका अनोळखी व्यक्तीला बोलावून घेतले. शिवीगाळ करू नका, असे सांगत असताना सून राणीने सासरे सिद्धेश्वर मेटकरी यांच्या हाताच्या पंजावर काठी मारली. सुनेचा भाऊ यशवंत लवटे याने काठीने मारहाण केली.
याबाबत सिद्धेश्वर मेटकरी यांनी फिर्याद दिली असून पोलिसांनी सून राणी मेटकरी, तिचा भाऊ यशवंत लवटे (रा. तनाळी, ता. पंढरपूर) व अनोळखी व्यक्तीविरोधात गुन्हा नोंदला आहे.