मांगीतील पाण्याचे अतिशय काटेकोरपणे नियोजन केलेले असल्यामुळे उन्हाळ्यात शेतीसाठी मागणीनुसार २१ दिवसांचे आवर्तन देता येऊ शकेल, अशी माहिती पाटबंधारे विभागाकडून देण्यात आली आहे. या पाण्याचा फायदा मांगी, पोथरे, अर्जुननगर, भालेवाडी गावातील लोकांना होणार आहे.
दोन दिवसांपासून डाव्या कालव्यातून ४५ क्‍युसेकने पाणी सुरू केले आहे. मागणीनुसार उजव्या कालव्यातूनही पाणी सुरू केले जाणार आहे असे शाखा अभियंता इंगळे यांनी सांगितले.
ज्या ज्या गावांमधून पाण्याची मागणी येईल, त्या मागणीच्या क्षेत्राचा विचार करून संबंधित गावाला पाणी देण्याचे नियोजन करण्यात येणार आहे. त्यामुळे नागरिकांनी पाण्याविषयीची मागणी पाटबंधारे कार्यालयाकडे नोंदवावी, असे आवाहन पाटबंधारे विभागाचे उपअभियंता कुलकर्णी यांनी केले आहे.