सांगोला : एका युवकाने घरातील पत्र्याच्या लोखंडी अँगलला ओढणीने गळफास घेऊन आत्महत्या केल्याची घटना सांगोल्यात घडली. त्याच्या आत्महत्येमागील कारण समजू शकलेले नाही.
जय राजू साठे (वय १९, रा.संजयनगर झोपडपट्टी, सांगोला) असे आत्महत्या केलेल्या युवकाचे नाव असून, मंगळवार, १३ जुलै रोजी सकाळी ८:३० वाजण्याच्या दरम्यान ही घटना घडली.
संजयनगरमध्ये राहणारे सचिन सर्जेराव गायकवाड हे मंगळवार सकाळी भाचा जय राजू साठे याचे घरी टुथपेस्ट आणण्यासाठी गेले होते. खोलीचा दरवाजा बंद असल्याने त्यांनी बाहेरून आवाज दिला. मात्र, दार न उघडल्याने संशय बळावला आणि दरवाजा ढकलून ते आत गेले. आतमध्ये भाचा जय साठे याने बाहेरील रूममधील पत्र्याच्या लोखंडी अँगलला ओढणीने गळफास घेतल्याचे निदर्शनास आले. इतक्यात, शेजारी राहणारे अजीज नदाफ व त्यांचे वडील सर्जेराव गायकवाड यांनी ओढणी कापून त्याला खाली उतरवले आणि उपचाराकरिता सांगोला ग्रामीण रुग्णालयात दाखल केले. मात्र, उपचारापूर्वीच तो मरण पावल्याचे डॉक्टरांनी जाहीर केले. याबाबत जयचे मामा सचिन गायकवाड यांनी सांगोला पोलिसात खबर दिली आहे.