पोलिसांकडून मिळालेल्या माहितीनुसार दोन महिन्यांपूर्वी अण्णा दांडगे व सुरज ऊर्फ लल्या गंगेकर यांच्यात जुनी पेठ भागात भांडण झाले होते. तेव्हा अण्णा दांडगे याने पोलीस ठाण्यात जाऊन त्याच्याविरुद्ध तक्रार दिली होती. त्यानंतर अण्णा दांडगे याने सुरज ऊर्फ लल्या गंगेकर याच्यापासून जीवितास धोका असल्याबाबत पोलीस ठाण्यास व इतर ठिकाणी अर्ज दिले होते. याचा राग मनात धरुन रविवारी सायंकाळी साडेपाचच्या सुमारास अण्णा दांडगे याच्या डोक्यात निखील गंगेकर याने कोयता मारला. तेव्हा सुरज ऊर्फ लल्या याने त्याच्या जवळील कोयत्याच्या उलट्या बाजूने अण्णाच्या पायावर मारले.
शिवा रामा इंदापूरकर (वय २२, रा. डोंबेगल्ली, भुयाच्या मारुतीजवळ, पंढरपूर) हे भांडण सोडविण्यास गेले असता विवेक गंगेकर याने बाजूस पडलेली विट हातात घेऊन त्यांच्या डोक्यात मारत मला बाजूला ढकलत नेले. त्याचवेळी बालाजी ऊर्फ काळू टमटम, ओंकार टमटम व असिम खान याने क्रिकेट स्टंपने तर अभिषेक टमटम याने क्रिकेट बॅटने अण्णा यास मारहाण केली. त्यादरम्यान निखिल हा त्याच्या नमूद साथीदारांना अण्णा यास मारुन टाकू, त्यास आता सोडायचे नाही, असे मोठमोठ्याने ओरडत होता. यानंतर जखमी अण्णा दांडगे याला उपचारासाठी रुग्णालयात पाठवण्यात आले. या प्रकरणी शिवा इंदापूरकर यांनी पोलीस ठाण्यात तक्रार दिली आहे. मारहाण करणारे अद्याप फरास असून पुढील तपास सपोनि. राजेंद्र मगदुम करीत आहेत.