सोलापूर विभागाला पाच गाड्या मंजूर

रेल्वे अर्थसंकल्प : गदग-पंढरपूर टुरिस्ट ट्रेन

सोलापूर : केंद्रीय रेल्वेमंत्री सदानंद गौडा यांनी मंगळवारी जाहीर केलेल्या अर्थसंकल्पात सोलापूरकरांच्या पदरी फारसे काहीच पडले नाही. मध्य रेल्वेच्या सोलापूर विभागाला पाच गाड्यांना मंजुरी मिळाली असून, सोलापूरसाठी बीदर-सीएसटी (मुंबई) ही एकमेव गाडी मिळाली आहे. गदग-पंढरपूर या टुरिस्ट गाडीस मंजुरी देतानाच सोलापूर-तुळजापूर मार्गाचे सर्वेक्षण करून रेल्वेमंत्र्यांनी तीर्थक्षेत्रांच्या विकासाला गती देण्याचा प्रयत्न केला आहे. मंजुरी मिळालेल्या अहमदाबाद-चेन्नई ही गाडी सुरू झाल्यास ती सोलापूर, वाडीमार्ग धावणार आहे. आठवड्यातून दोनवेळा ही गाडी सोडण्यास मंजुरी मिळाली आहे. बीदर-मुंबई ही नवी गाडी कुठल्या मार्गावरून धावेल, याबाबत रेल्वे प्रशासनही संभ्र्रमावस्थेत आहे. ही गाडी गुलबर्गा-सोलापूरमार्गे अथवा लातूर-सोलापूरमार्गे अथवा परळी वैजनाथ, औरंगाबाद, भुसावळ या मार्गेही धावू शकते. मार्ग निश्चित झाल्यावरच या गाडीविषयी बोलणे बरे होणार असल्याच्या प्रतिक्रियाही ऐकावयास मिळाल्या. विभागाचा विचार केला तर नागपूर-पुणे ही साप्ताहिक (मनमाड, दौंडमार्गे) आणि हजरत निजामोद्दीन-पुणे (भुसावळ, दौंडमार्गे) या दोन गाड्या मिळाल्या आहेत. ---------------------------देवीभक्तांना दिलासासोलापूर-तुळजापूर मार्गाच्या सर्वेक्षणास अर्थसंकल्पात मंजुरी देऊन सदानंद गौडा यांनी देवीभक्तांना दिलासा दिला आहे. सर्वेक्षणाचे काम पूर्ण झाल्यावर पुढील प्रक्रिया पूर्ण होईपर्यंत किती अवधी लागेल, याचा नेम नाही. याआधी सोलापूर-जळगाव मार्गाच्या सर्वेक्षणास मंजुरी मिळाली होती. सर्वेक्षणाचे काम पूर्ण होऊनही हे काम अद्याप कागदावरच आहे. त्यामुळे सोलापूर-तुळजापूर मार्गाचा विषय कागदावरच राहू नये, अशी देवीभक्तांची अपेक्षा आहे.