खरीप हंगाम पूर्व हा वळवाचा पाऊस शेतीला पोषक मानला जात आहे. मात्र, तालुक्यातील दक्षिण पश्चिम व उत्तरेकडील काही भागांत जोरदार वादळी वारे वाहत होते. काही ठिकाणी तुरळक पाऊस झाल्याचे सांगण्यात आले.
सध्या लॉकडाऊन असल्याने सर्वजण घरात बसून आहेत. त्यामुळे नागरिक उकाड्याने हैराण झाले होेत. त्यात दुपारनंतर जोरदार वादळी वारे वाहत मेघगर्जनेसह पाऊस झाला. दोन दिवसांपूर्वी अचकदाणी, कटफळ या भागाला वादळी वाऱ्याचा जोरदार फटका बसून घरावरील पत्रे उडून गेले. महावितरण कंपनीचे विजेच्या खांबावरील तारा तुटून नुकसान झाले होते, दरम्यान शेतकऱ्यांनी रब्बी हंगामातील कामे उरकून खरीप हंगामासाठी शेतीच्या मशागतीची कामे उरकून उसंती घेतली सुरू आहेत.
रविवारी सकाळपासूनच वातावरणात बदल होऊन दुपारनंतर अचानक पावसास सुरुवात झाली. सुमारे अर्धा ते पाऊण तास मेघगर्जनेसह गारांचा पाऊस झाल्याने सर्वत्र पाणीच पाणी झाले. वळवाच्या पावसात बाळगोपाळांनी भिजून आनंद घेतला तर उकाड्याने हैराण झालेल्या आबालवृद्धांना थंडगार हवेमुळे दिलासाही मिळाला. या पावसामुळे कडवळ, उन्हाळी भुईमूग, डाळिंबासह फळबागांना दिलासा मिळाला आहे.
वादळी वाऱ्याने झाडे उन्मळून पडली
रविवारी सांगोला शहर वाढेगाव, राजापूर, आलेगाव, मेडशिंगी, वाणीचिंचाळे, वाकी घेरडी, तरंगेवाडी, घेरडी, हंगिरगे, पारे, नराळे डिकसळ, शिरभावी, धायटी, चिंचोली या परिसरात पावसाने जोरदार हजेरी लावली. वाऱ्याचा वेग प्रचंड असल्यामुळे झाडाच्या फांद्या तुटून व वृक्ष उन्मळून पडल्याचे सांगण्यात आले तसेच केशर, गावरान आंब्याचे मोठे नुकसान झाल्याचे अंदाज वर्तविला जात आहे.
फोटो
०९सांगोला-पाऊस
सांगोला शहरासह बिलेवाडी, सावंतवस्ती, बुरांडेवस्ती परिसरात झालेल्या पावसाचे छायाचित्र.