बार्शी : बार्शी शहरातील शिवशक्ती मैदानाजवळ घराकडे निघालेल्या पादचारी शिक्षिकेस दुचाकीवरून आलेल्या दोघांनी अडवून गळ्यातील मंगळसूत्र, सोन्याची चेन, मोबाईल काही रोखड असा लाखांचा ऐवज चोरट्यांनी लुटला.
शनिवारी रात्री हा प्रकार घडला असून याबाबत प्राथमिक शाळेच्या शिक्षिका मनीषा सुजित गाढवे (४३, रा. कासारवाडी रोड, बार्शी) यांनी शहर पोलिसांत फिर्याद दिली आहे. या महिलेच्या गळ्यातील १५ ग्रॅम सोन्याचे मंगळसूत्र, सोन्याची चेन, रोख दीड हजार रुपये, मोबाईल हिसकावून चोरट्यांनी पळ काढला.
पोलीस सूत्रांकडील माहितीनुसार मनीषा या त्यादिवशी कुर्डुवाडी रोडवरील अध्यापक कॉलनी येथील भाडेकरूंना भेटून चालत कासारवाडी रोडवरून स्वत:च्या घराकडे पायी निघालेल्या होत्या. इतक्यात दुचाकीवरून दोघेजण तोंडाला रुमाल बांधून आले. त्यांनी महिलेच्या समोर येऊन अचानक गाडी थांबविली. त्यांच्या गळ्यातील मंगळसूत्र व चेन, दागिने पर्समधील पैसे व मोबाईल घेऊन पसार झाले. जाता-जाता फोनही पळविला. घरी परतल्यानंतर मनीषा यांनी कऱ्हाड येथे राहात असलेल्या पतीशी संपर्क साधून याची माहिती दिली. त्यानंतर पोलीस ठाण्यात धाव घेऊन याबाबत पोलिसांत तक्रार नोंदविली.