अजनाळे येथे सातजणांच्या मारहाणीत माय-लेक जखमी

अजनाळे येथील सज्जन महादेव भंडगे व सहदेव दशरथ भंडगे हे शेजारी राहण्यास आहेत. सोमवारी सज्जन हा सहदेव भंडगे यांची एमएच ४५/केबी ८००२ ही दुचाकी घेऊन कामानिमित्त अजनाळे गावात गेला होता. काम आटोपून सायं. ६ च्या सुमारास तो घरी परतल्यानंतर सहदेव भंडगे यास दुचाकी परत देण्यासाठी गेला असता तेथे भावकीतील अर्जुन भंडगे, मंगल भंडगे, संतोष भंडगे, समीर भंडगे, दादासाहेब भंडगे, सुरेखा भंडगे, काकासाहेब भंडगे यांनी सज्जनला तुला लय माज आला आहे, असे म्हणून हाताने मारहाण करू लागले. त्यावेळी त्याने माझी काय चूक आहे, तुम्ही मला का मारत आहात असे म्हटल्यानंतर वरील महिला व पुरूष अशा ७ जणांनी त्यास शिवीगाळ, दमदाटी करत वेळूच्या काठीने हातपाय, पाठीवर, डोक्यात मारहाण करण्यास सुरुवात केली. यावेळी सोडवासोडवी करण्यासाठी आलेली आई कमलाबाई भंडगे हिलाही मारहाण केली. या भांडणात सज्जन भंडगे चक्कर येऊन खाली पडल्याचे पाहून सर्वजण तेथून निघून गेले. याबाबत सज्जन भंडगे यांनी फिर्याद दाखल केली आहे. पोलिसांनी ७ जणांविरुद्ध गुन्हा दाखल केला आहे.