त्या-त्या तलावाच्या लाभक्षेत्रात रब्बी हंगामातील ज्वारी, गहू ,मका, हरभरा ही पिके जोमात असल्याने शेतकऱ्यांच्या मागणीनुसार आवर्तन सोडले जात आहे. शेतकऱ्यांच्या मागणीनुसार उन्हाळी आवर्तनाचे नियोजन मार्च महिन्यात केले जाणार आहे.
तालुक्यात शेती व पिण्याच्या पाण्याच्या नियोजनासाठी पाटबंधारे विभागाकडून बुद्धेहाळ मध्यम, हंगिरगे, घेरडी, जवळा, अचकदाणी, चिंचोली या ठिकाणी लघु प्रकल्पाची निर्मिती केली. त्यामुळे त्या -त्या भागातील लाभक्षेत्र ओलिताखाली आणले. तालुक्यात नेहमीच कमी अधिक पर्जन्यमानामुळे तलाव पूर्ण क्षमतेने भरले नाहीत. परिणामी तलावाच्या लाभक्षेत्रातील शेतकऱ्यांना पाणीटंचाईला तोंड द्यावे लागले.
दरम्यान गेल्या दोन वर्षांपासून परतीच्या पावसाबरोबर अतिवृष्टी झाल्याने तालुक्यातील नद्या, नाले, ओढयांना पूर आल्यामुळे पाण्याची परिस्थिती बदलली. २८ फेब्रुवारीनंतर रब्बी हंगाम संपून उन्हाळी हंगाम चालू होत आहे. उन्हाळ्याच्या पार्श्वभूमीवर तालुक्यातील प्रकल्पातील उपलब्ध पाणीसाठा कमी होत असल्याने शेतीला व जनावरांना पिण्याच्या पाण्याची टंचाई निर्माण होणार आहे. त्यादृष्टीने पाटबंधारे विभागाकडून पिण्याच्या पाण्याचे नियोजन करून शेती पिकांना पाणी दिले जाणार आहे. आवश्यकतेनुसार टेंभू योजनेतून बुद्धेहाळ तलावात तर म्हैसाळ योजनेतून घेरडी हंगिरगे जवळा तसेच नीरा उजवा कालव्यातून चिंचोली या तलावात पाणी सोडून भरून घेण्याचे नियोजन आहे.
चिंचोली तलावाच्या लाभक्षेत्रातील शेतक-यांनी पाणी वापर संस्था निर्माण केल्याने उन्हाळी पिकांबरोबरच फळबागांना पाण्याची मागणी वाढणार आहे. दरम्यान शेतकऱ्यांकडून उन्हाळी पिकांसाठी चार अवर्तनाची मागणी गृहीत धरून उपलब्ध पाणीसाठा मागणीचा विचार करता पुरेल इतका पाणीसाठा बुद्धेहाळ प्रकल्पात शिल्लक आहे. तरीही पाण्याची कमरता भासण्याची शक्यता निर्माण झाल्यास टेंभू योजनेतून पाणी सोडून भरून घेण्याचे नियोजन असल्याचे अभियंता बी. एल. केंगार यांनी सांगितले.
प्रकल्पातील पाणीसाठा
तालुक्यातील मध्यम व लघु पाटबंधारे तलावातील उपलब्ध पाणीसाठा व टक्केवारी
बुद्धेहाळ ५३० दलघफू (७९ टक्के ), घेरडी ६०.९३ दलघफू (७०.१७ टक्के), हंगिरगे १९.८० दलघफू (४२.०८ टक्के), जवळा ३४.७८ दलघफू (७४.४९ टक्के), अचकदाणी ३६.२३ दलघफू (७५.९५ टक्के), चिंचोली ७९.७५ दलघफू (७३.८३ टक्के) असा पाणीसाठा उपलब्ध आहे.