पोलीस सूत्रांकडून मिळालेल्या माहितीनुसार ओंकार पांडुरंग दांडगे (वय २० रा. वेळापूर) हा आई छाया पांडुरंग दांडगे (वय ४५ रा. वेळापूर) व बहीण सृष्टी पांडुरंग दांडगे (वय १८ रा. वेळापूर) अशा दोघींना आजारी असल्याने (एमएच ०१ एएस २३७०) दुचाकीवरून अकलूज येथील दवाखान्यात उपचारासाठी जात होता. माळेवाडी येथील प्राथमिक शाळेजवळ मागून येणाऱ्या मालवाहतूक कंटेनरने (केए ०१एएच ५९५१) ने जोरदार धडक दिली. यामध्ये छाया दांडगे व सृष्टी दांडगे यांचा जागीच मृत्यू झाला. तर ओंकार दांडगे हा गंभीर जखमी झाला. त्याच्यावर खाजगी दवाखान्यात उपचार चालू आहेत.
याबाबत विनोद राजकुमार पवार (रा. वेळापूर) याने अकलूज पोलिसात फिर्याद दिली आहे. कंटेनरचालक शिवशंकर हाजी बसप्पा (वय ४३, रा. नामकल तामिळनाडू) याला ताब्यात घेतले आहे. अधिक तपास सहाय्यक पोलीस निरीक्षक वैभव मारकड करीत आहेत.
---
मृतदेहाच्या चिंधड्या उडाल्या
अपघात एवढा भीषण होता की, कंटेनर खाली सापडलेले मृतदेह जवळपास १०० मीटर पर्यंत फरपटत गेले. त्यामुळे मृतदेहाच्या अक्षरश: चिंधड्या झाल्या. दरम्यान अपघातानंतर बघ्यांची प्रचंड गर्दी जमल्याने काहीकाळ वाहतूक खोळंबळी. अकलूज पोलिसांनी तत्काळ घटनास्थळी भेट देऊन वाहतूक सुरळीत केली. व मृतदेह शवविच्छेदनासाठी ताब्यात घेतले.
-----