जूनच्या पहिल्या दिवसापासून सलग पाऊस पडत आहे. थोडा पाऊस झाला तरी लगेच विद्युतपुरवठा खंडित होतो. या महिन्यात शहरासह ग्रामीण भागात वीजपुरवठा वारंवार खंडित होण्याचे प्रकार वाढत आहेत. वीजपुरवठा सुरळीत करण्यासाठी यंत्रणा कार्यरत असून, तांत्रिक बिघाडाची तातडीने दुरुस्ती करण्यात येत असल्याचे महावितरणच्या कार्यालयातून सांगण्यात येते. परंतु वीज समस्येमुळे नागरिक मात्र हैराण झाले आहेत.
वाऱ्यामुळे ग्रामीण भागातील काही ठिकाणी वीजतारा, खांब पडत असल्यामुळे ही समस्या निर्माण होत असल्याचे महावितरणचे म्हणणे आहे. पावसामुळे शहरातील काही भागातील खंडित वीजपुरवठा दुरुस्त करण्यात यश आले. शहर व ग्रामीण भागातही वीज यंत्रणेच्या दुरुस्तीची व देखभालीची कामे सुरू असल्याने वीजपुरवठ्याची समस्या लवकरच सुटेल, असे महावितरणकडून स्पष्ट केले आहे.
ग्रामीणमध्ये विजेचा लपंडाव
तालुक्यात मान्सूनपूर्व पावसाने हजेरी लावली आहे. शहरासह ग्रामीण भागात पाऊस सुरू झाल्यानंतर वीज जाण्याचे प्रकार घडले आहेत. बहुतांश ग्रामीण भागात तर १५-१५ तास वीज नसल्यामुळे नागरिकांचे हाल होत आहेत. ही समस्या सोडवण्याची मागणी जोर धरू लागली आहे. सध्या बरेचशे कोरोना रुग्ण घरीच उपचार घेत असून काही रुग्णांना ऑक्सिजन घरीच लावले जात आहेत. अशा स्थितीत जास्त वेळ विद्युतपुरवठा खंडित होण्यामुळे रुग्णांच्या जीवाची घालमेल होत आहे. महावितरणच्या टीमने अशा परिस्थितीत सतर्क राहणे गरजेचे असल्याचे विकास पुजारी यांनी सांगितले.
मान्सूनपूर्व कामांचा फज्जा
पावसाळ्यात वीजप्रवाह खंडित होऊ नये, यासाठी महावितरणतर्फे मान्सूनपूर्व कामे हाती घेतली होती. शहरासह ग्रामीण भागात विजेच्या तारांमध्ये अडकणाऱ्या झाडांच्या फांद्या तोडण्याचे काम सुरू केले होते. प्रत्यक्षात मात्र मान्सूनपूर्व पावसाचे आगमन होताच वीजपुरवठा खंडित होऊ लागल्याने महावितरणने देखभालीच्या केलेल्या कामांबाबत प्रश्नचिन्ह उपस्थित होत आहे.
कोट ::::::::::::::::::::
तालुक्यातील विविध भागात वीज वाहिन्या व यंत्रणेच्या दुरुस्तीचे काम सुरू आहे. नागरिकांच्या तक्रारी आल्यानंतर त्या तातडीने सोडवण्यात येत आहेत. वीजसेवा खंडित झाल्यास नागरिकांनी तत्काळ महावितरण कार्यालयात माहिती द्यावी. शहरासह ग्रामीण भागातील विजेचे प्रश्न लवकर मार्गी लावण्यात येतील.
- संजय शिंदे
उपकार्यकारी अभियंता, महावितरण