आषाढी यात्रा भरली तरी गर्दीमध्ये कोणताही अनुचित प्रकार घडून जीवित हानी होऊ नये, गर्दीमुळे चेंगराचेंगरी होऊ नये, वारकऱ्यांची वारी सुरक्षित व्हावी, यासाठी हजारो पोलिसांचा बंदोबस्त पंढरपुरात लावण्यात येतो. आता कोरोना संसर्गजन्य रोगामुळे आषाढी यात्रा मोजक्याच भाविकांत होत आहे. तरीही पंढरपुरात गर्दी होऊ नये, यासाठी पंढरपूर शहर व तालुक्यात हजारो पोलिसांचा बंदोबस्त लावण्याची वेळ पोलीस प्रशासनावर आली आहे. मागीलवर्षीप्रमाणे यंदाच्या वर्षी देखील भाविकांना पंढरपुरात येण्यापासून रोखण्यासाठी तीन स्तरात पोलीस बंदोबस्त लावण्यात येत आहे. यामध्ये जिल्हा हद्द, तालुका हद्द व शहर हद्दीत प्रवेश करण्याच्या ठिकाणी नाकाबंदी करण्यात येणार आहे.
यासाठी १७०० पोलिसांनी शहर पोलीस ठाण्यात रिपोर्टिंग केले आहे. या सर्व पोलीस कर्मचारी व अधिकाऱ्यांची कोरोनाची तपासणी करण्यात आली आहे. यामध्ये केवळ ४ पोलीस कर्मचारी कोरोना पॉझिटिव्ह आले आहेत. त्यामुळे त्यांना त्यांच्या घरी व गावी उपचारासाठी पाठवले असल्याची माहिती विक्रम कदम यांनी दिली.
बंदोबस्तासाठी पोलिसांचे ऑनलाईन रजिस्टर
स्वेरी महाविद्यालयाने आषाढी यात्रेच्या पोलीस बंदोबस्ताचे ऑनलाईन पध्दतीचे मोबाईल ॲप तयार केले आहे. यामध्ये बंदोबस्तासाठी आलेल्या प्रत्येक पोलीस कर्मचाऱ्याची नोंद होते. त्यांना या ॲपद्वारे बंदोबस्त पाॅईंट, संबंधीत अधिकारी व इतर सूचना दिल्या जात आहेत. शुक्रवारपर्यंत १६०० च्या आसपास पोलिसांची नोंद करण्यात आली आहे. पुढील दोन दिवसात आणखी पोलीस यात्रेसाठी येणार असल्याची माहिती सपोनि. कपिल सोनकांबळे यांनी दिली.
पोलीस ठाण्यातच कोरोना तपासणी केंद्र
आषाढी यात्रेच्या बंदोबस्तासाठी आलेल्या पोलिसांच्या माध्यमातून इतर कोणाला कोरोनाची लागण होऊ नये. यासाठी प्रत्येक पोलिसाची कोरोनाची चाचणी करण्यात येत असून पंढरपूर शहर पोलीस ठाण्यातच कोरोना तपासणीची २ केंद्रे सुरू करण्यात आली आहेत. त्याचबरोबर बंदोबस्त वाटपासाठी एक केंद्र तयार करण्यात आले आहे. तसेच पोलिसांना आरोग्य किटचे वाटप करण्यासाठी देखील केंद्र सुरू करण्यात आले असल्याची माहिती पोलीस निरीक्षक अरुण पयार यांनी दिली.
फोटो :::::::::
पंढरपूर येथे बंदोबस्तासाठी आलेले पोलीस कर्मचारी कोरोना चाचणी करून घेताना, आरोग्य विभागाचे कर्मचारी व उपविभागीय पोलीस अधिकारी विक्रम कदम, सपोनि. एम. एन. जगदाळे, सपोनि. कपिल सोनकांबळे, उपपोनि. प्रशांत भागवत.