विजय विलास सरगर (वय २१, रा. कवलापूर, ता. मिरज) असे मृताचे नाव आहे.
या खूनप्रकरणी पोलिसांनी वडील विलास बाबू सरगर (४५), उत्तम महादेव मदने (२७, सध्या रा. डेरवली, उरण पनवेल मूळ रा. लक्ष्मीनगर सांगली, प्रकाश गोरख कोळेकर (२४), संतोष विठ्ठल पांढरे (२६) व वैभव तानाजी आलदर (१९) सर्व रा. कोळा, कराडवाडी, ता. सांगोला) यांना अटक केली आहे.
दरम्यान, तपास अधिकाऱ्यांनी बुधवारी पाच जणांना न्यायालयात हजर केले. न्यायाधीश देशमुख यांनी त्यांना १ ऑगस्टपर्यंत पाच दिवसांची पोलीस कोठडी दिल्याचे पोलीस निरीक्षक सुहास जगताप यांनी सांगितले.
१५ जुलै रोजी बुद्धेहाळ येथील तलावात अनोळखी इसमाचे धडावेगळे शीर नसलेला मृतदेह आढळून आला होता. याबाबत, पोलिस पाटील सोपान गडदे यांनी अज्ञात व्यक्तींविरोधात फिर्याद दाखल केली होती.
पोलीस निरीक्षक सुहास जगताप यांनी सदर गुन्ह्याच्या तपासाकरिता सांगली, सोलापूर, कोल्हापूर जिल्ह्यात पोलीस पथके पाठवली होती. तपासादरम्यान सांगली पोलिसांनी विलास बाबू सरगर या संशयिताला ताब्यात घेऊन सांगोला पोलिसांच्या ताब्यात दिले. सांगोला पोलिसांनी त्याला पोलिसी खाक्या दाखवून चौकशी केली. यात त्याने सुपारी देऊन पोटच्या मुलाचा खून केल्याची कबुली दिली.
या गुन्ह्याचा तपास पोलिस अधीक्षक तेजस्वी सातपुते, अप्पर पोलीस अधीक्षक अतुल झेंडे, उपविभागीय पोलीस अधिकारी राजश्री पाटील, पोलीस निरीक्षक सुहास जगताप यांच्या मार्गदर्शनाखाली सहायक पोलीस निरीक्षक प्रशांत हुले यांनी केला. तपासकामी सहायक पोलीस फौजदार कल्याण ढवणे, पोलीस हवालदार राजू चौगुले, पोलीस नाईक विजय थिटे, दत्तात्रय वजाळे, आप्पा पवार, लक्ष्मण वाघमोडे, गणेश कुलकर्णी, गणेश कोळेकर, सायबर गुन्हे शाखेचे अनवत आतार, सुनील लोंढे, मनोहर भुजबळ यांनी मदत केली.
-----
असा रचला कट
पोलिसांनी या गुन्ह्यात उत्तम महादेव मदने, प्रकाश गोरख कोळेकर, संतोष विठ्ठल पांढरे व वैभव तानाजी आलदर यांना ताब्यात घेऊन चौकशी केली. यात त्यांनी या गुन्ह्याची कबुली दिली. बापानेच पूर्वनियोजित कट करून ११ जुलैला विजय सरगर यास डाळिंबाची स्वस्त दरात खरेदी करून देण्याचा बहाणा करून त्याला टमटम घेऊन बोलावून घेतले. त्याच्यासोबत कोळा येथील यश हॉटेलमध्ये जेवण करून ठरलेल्या कटाप्रमाणे रात्री ११ ते १२ च्या दरम्यान मोकळ्या रानात कोयत्याने विजयचे शीर धडावेगळे करून त्याचा खून केला. मृतदेह चटई व शेडनेटमध्ये दोरीने बांधून पुरावा नष्ट करण्याच्या उद्देशाने दगड बांधून बुद्धेहाळ तलावात टाकून दिला, असे त्यांनी पोलिसांना सांगितले.
------