पिता-पुत्रांनी शेजाऱ्याचा ४५० पेंड्या चारा पेटविला

बलवडी येथील आत्माराम पांडुरंग शिंदे यांनी शेतात गेल्यावर्षी ४५० पेड्यांची बाजरीची गंज (बुचड) लावली होती. गावात त्यांच्या शेजारी सुरज राजेंद्र पंडित हा कुटुंबासह राहण्यास असून दोघांमध्ये अधूनमधून भांडणतंटा होत होता. २३ जून रोजी आत्माराम शिंदे यांचा मुलगा विजय व सूरज पंडित यांच्यात घरातील टेपच्या आवाजावरून वादावादी झाली. त्यावेळी सूरजने विजय शिंदे यास मी तुला सोडणार नाही, अशी धमकी दिली. त्यानंतर रात्री ८.३० च्या सुमारास शेताजवळील नवनाथ निंबाळकर यांनी आत्माराम शिंदे यांच्या घरी येऊन तुमच्या शेतातील बाजरीची बुचड सुरज पंडित व त्याचे वडील राजेंद्र पंडित यांनी पेटवून दिल्याचे सांगितले. त्यांनी शेतात जाऊन पाहिले असता ४५० पेंड्याची बुचड जळून खाक झाल्याने त्यांचे सुमारे ४५०० हजार रुपयाचे नुकसान झाले. याबाबत आत्माराम शिंदे यांनी सुरज पंडित व राजेंद्र पंडित पिता-पुत्राविरुध्द पोलिसात फिर्याद दाखल केली आहे.