सांगोला : भरधाव वेगातील दुचाकीने समोरून जोराची धडक दिल्याने एका ६५ वर्षीय वृद्ध ट्रॅक्टर चालकाचा मृत्यू झाला.
भिकाजी निवृत्ती चव्हाण (वय ६५, रा. सावे, ता. सांगोला) असे मरण पावलेल्या ट्रॅक्टर चालकाचे नाव असून बुधवारी रात्री ९ च्या सुमारास सांगोला अजळकर हाॅस्पिटल ते भीमनगर रोडवरील पुलावर हा अपघात घडला.
ट्रॅक्टर चालक भिकाजी चव्हाण हे सांगोला येथील माऊली तेली यांच्या ट्रॅक्टरवर चालक म्हणून कामास होते. बुधवारी रात्री ९ च्या सुमारास ते सांगोला अजळकर हाॅस्पिटल ते भीमनगर रोडने पायी चालत निघाले होते. यावेळी समोरुन भरधाव येणाऱ्या (एम.एच. ४५़, ९५०९) या दुचाकीने त्यांना पुलावर समोरून जोराची धडक दिल्याने डोक्यास गंभीर मार लागला होता. चिंचोली रोड येथील देवासूर्यगण यांनी अपघाताची माहिती जखमीचा चुलत भाऊ सुरेश चव्हाण यांना दिली.
दरम्यान पोलिसांनी जखमी अवस्थेत त्यांना सांगोला येथील ग्रामीण रुग्णालयात दाखल केले असता उपचारापूर्वीच त्यांचा मृत्यू झाला. याबाबत सुरेश भगवान चव्हाण (रा. चिंचोली रोड, सांगोला) यांनी फिर्याद दिली आहे.