पंढरपूर-मंगळवेढा विधानसभा पोटनिवडणुकीसाठी भाजपाच्या वतीने समाधान आवताडे यांनी उमेदवारी अर्ज दाखल केली. या नंतर झालेल्या कार्यकर्त्यांचा मेळाव्या प्रसंगी चंद्रकांत पाटील बोलत होते. यावेळी खासदार जयसिध्देश्‍वर स्वामी, माजी पालकमंत्री विजयकुमार देशमुख, माजी मंत्री सुभाष देशमुख, राम शिंदे, श्रीकांत भारती, प्रशांत परिचारक, गोपीचंद पडळकर, रणजितसिंह मोहिते-पाटील, राम सातपुते, सचिन कल्याणशेट्टी, संभाजी निलंगेकर आदी आमदार, नगराध्यक्षा साधना भोसले, उपसभापती राजश्री भोसले, आरपीआयचे राजाभाऊ सरवदे, रयत क्रांतीचे दीपक भोसले, डॉ.बी.पी.रोंगे आदी उपस्थित होते.
यावेळी बोलताना पाटील यांनी, हे सरकार स्थापन झाल्यापासून सर्वसामान्यांना फसवत असल्याचा आरोप केला. अतिवृष्टी मदत, कोरोना काळातील अपयश, वीज तोडणी व आता वाझे प्रकरण या सर्वांचा परिणाम म्हणूनच नुकत्याच पार पडलेल्या ग्रामपंचायतीच्या निवडणुकीत जनतेच्या या सरकारच्या विरोधात कौल दिला. साडे सहा हजार ठिकाणी भाजपाचे सरपंच नियुक्त झाले. यामुळे जाणता राजा घाबरला आणि त्यांनी मुख्यमंत्री उध्दव ठाकरे यांना तातडीने पुढील निवडणुका न घेण्याची सूचना केली. यामुळे ५ महानगरपालिका, ९२ नगर परिषदा तसेच शेकडो सहकारी संस्थांच्या निवडणुका स्थगित केल्याचा दावा चंद्रकांत पाटील यांनी केला.
त्यानंतर समाधान आवताडे म्हणाले, महाविकास आघाडीचे सरकार खंडणीखोर असून त्यांच्यामुळे संपूर्ण देशात राज्याची बदनामी झाली आहे. लवकरच हे सरकार खाली उतरणार असून भाजपा पुन्हा सत्ता स्थापन करणार आहे. पंढरपूर-मंगळवेढा मतदार संघात मागील तीनवेळा जनतेने निवडून दिलेल्या लोकप्रतिनिधीने प्रश्‍न सोडविले नाहीत. मतदानामधून ही नाराजी बाहेर पडणार असून परिचारक यांच्या मदतीने दोन तारखेला गुलाल घेऊनच मुंबईत जाणार असल्याचा विश्‍वास समाधान आवताडे यांनी व्यक्त केला. खा. जयसिध्देश्‍वर स्वामी यांनी, राज्याच्या सत्ता परिवर्तनाचे बिगुल पंढरीतून वाजले असल्याचे सूचक वक्तव्य केले. पंढरीतून परिवर्तन होणार असून ते राज्यामध्ये देखील लवकरच होणार असल्याचा विश्‍वास व्यक्त केला.
राम व लक्ष्मणाची जोडी ::::::
चंद्रकांत पाटील यांनी आपल्या भाषणात आमदार प्रशांत परिचारक व उमेश परिचारक या बंधूचा उल्लेख राम लक्ष्मणाची जोडी असा केला. आजच्या जगात एखाद्या व्यक्तीकडे दोन रूमाल असतील तर तो एक रूमाल देणार नाही. परंतु या परिचारक बंधूनी मनाचा मोठेपणा दाखवत समाधान आवताडे यांच्यासाठी माघार घेतली. दोघांपैकी एकानेच निवडणुकीच्या रिंगणात उभे रहावे असा विचार पक्षाने मांडल्या नंतर यावर प्रशांत परिचारक यांची दावेदारी होती. मात्र त्यांनी मोठे मन करून आवताडे यांना संधी दिली. यामुळे भाजपा परिचारक यांचा आभारी आहे या शब्दात कौतुक केले.
फोटो :::::::::::::::
पंढरपूर येथे कार्यकर्ता मेळाव्यानिमत्त एकत्र आलेले भाजपाचे प्रदेशाध्यक्ष चंद्रकांत पाटील, माजी मंत्री राम शिंदे, बाळाभाऊ भेगडे, आ. गोपीचंद पडळकर, आ. प्रशांत परिचारक, श्रीकांत देशमुख,