सोलापूर : शेळगाव ( आर ), ता. बार्शी येथील एका तरुणाने आजाराला कंटाळून ग्रामपंचायत पाणीपुरवठा करणाऱ्या पाण्याच्या टाकीच्या शिडीला गळफास घेऊन आत्महत्या केली. शरद गायकवाड (वय ३८, रा. शेळगाव आर, ता. बार्शी ) असे आत्महत्या केलेल्याचे नाव आहे.
ही घटना बुधवार दि. ३० ऑगस्ट रोजी सकाळी सहा वाजण्यापूर्वी घडली आहे. शरद मारुती गायकवाड (वय ३८ , रा. शेळगाव, ता. बार्शी) याने ग्रामपंचायत सार्वजनिक पाण्याच्या टाकीस शिडी असणाऱ्या पायरीला सुती दोरीने गळफास घेतला. ३० ऑगस्ट रोजी सकाळी सहाच्या सुमारास ग्रामपंचायत शिपाई आण्णा गिलबिले यांना आत्महत्येचा प्रकार दिसून आला. गावचे पोलिस पाटील ज्ञानदेव नागणे व गावातील लोकांनी गळफास घेतलेल्या व्यक्तीस खाली उतरवले. वैराग येथे सरकारी दवाखान्यात शवविच्छेदन करण्यात आले. मृताचा मावसभाऊ राम देवकर यांनी याबाबत वैराग पोलिसांत माहिती दिल्याने घटनेची अकस्मात मृत्यू म्हणून नोंद झाली आहे. ते परिसरामध्ये जनावर उपचार करण्याचे काम करत होते.