टेंभुर्णी पोलिसांकडून मिळालेली माहिती अशी की, आशिबी अहमद केवी हा चालक कंटेनरचा केए ४१ ए२४०४ घेऊन अहमदाबाद येथून बेंगलोरकडे निघाला होता. शुक्रवार टेंभुर्णी पासून ७-८ किलोमीटर पूर्वेस आला असता त्यास रोडवर पडलेला जॅक दिसला. यामुळे त्याने कंटेनर थांबवून जॅक घेण्यासाठी उतरला असता रोडच्या बाजूस दबा धरून बसलेल्या चार ते पाच दरोडेखोरांनी अचानक हल्ला केला. दोन्ही चालकाला चाकूचा धाक दाखवत जबर मारहाण केली. नंतर त्यांचे हात-पाय बांधून रोडच्या कडेला साेडले व त्यांच्याकडील रोख रक्कम नऊ हजार रुपये व कंटेनर घेऊन पोबारा केला.
नंतर हे दोघे बराच वेळ तेथेच रस्त्यावर वाहनांना हात करीत होते. पण वाहने थांबली नाहीत. पोलीस गस्त वाहन आल्यावर त्यातून ते पोलीस ठाण्यात आले व घडलेला प्रकार पोलिसांना सांगितला. याबाबत चालक आशिबी अहमद केवी याने टेंभुर्णी पोलीस ठाण्यात फिर्याद दाखल केली. या घटनेचा अधिक तपास पोलीस निरीक्षक राजकुमार केंद्रे हे करत आहेत.
कंटेनर सोडले, टायर पळविले
चालकांस मारहाण करून कंटेनर पळवून नेला. पण तो कंटेनर टेंभुर्णी-पंढरपूर रोडवरील अकोले बुद्रूक गावच्या हद्दीत सापडला, पण त्याचे दोन टायर दरोडेखोरांनी चोरून नेल्याचे पोलिसांनी सांगितले.