अपघातातील गाडीसह चालकाला घेतले ताब्यात

माळशिरस : शहराजवळ सोमवारी झालेल्या अपघातात तरुणाचा मृत्यू झाला. या अपघातातील वाहनचालकाने पळून जाण्याचा प्रयत्न केला; मात्र माळशिरस पोलिसांनी खबऱ्यामार्फत या गाडीचा पाठलाग करत छडा लावत गाडी ताब्यात घेतली. ही गाडी पुसदमधून पंढरपूर व शिंगणापूर देवदर्शनासाठी भाविकांना घेऊन येत होती. अपघात झाल्यानंतर चालकाने पळून जाण्याचा प्रयत्न केला होता; मात्र पोलिसांच्या सतर्कतेमुळे गाडी व चालकाला ताब्यात घेण्यात आले आहे. यामध्ये पोलीस निरीक्षक विश्वंभर गोल्डे यांच्या मार्गदर्शनाखाली सपोनि शशिकांत शेळके, पोलीस गणेश गायकवाड, सचिन डुबल व चालक अन्सारी या पथकाने ही कारवाई केली.