अलीपूर रोडवरील देशमुख प्लॉट येथे २२ एप्रिल रोजी मुलाच्या घरासमोर ही घटना घडल्याचे फिर्यादीत म्हटले आहे.
याबाबत पोलीस नाईक गणेश वाघमोडे यांनी शहर पोलिसात तक्रार देताच नवरदेव रवी विवेक अडसूळ (वय २३), चुलतभाऊ श्रीनिवास अडसूळ (वय ३५), भावजय संध्या अडसूळ (वय २९), आई नम्रता अडसूळ (५३, सर्व रा. देशमुख प्लॉट बार्शी) तर वधूकडील मुलीचे आई,वडील या सहा जणांविरुद्ध बालविवाह प्रति. अधिनियम २००६ चे कलम ९, १०, ११ प्रमाणे गुन्हा नोंद केला आहे.
दरम्यान, या दिवशी होणाऱ्या बालविवाहाची माहिती सोलापूरहून एका व्यक्तीने फोनवरून शहर पोलिसांना दिली. त्यांच्यावर कारवाई करावी, असे सांगितल्याने या वेळी हवालदार चंद्रकांत आदलिंगे, इसाक सय्यद, पोलीस नाईक गणेश वाघमोडे हे पेट्रोलिंग करीत असताना त्यांनी देशमुख प्लॉट येथे बालविवाहाच्या ठिकाणी जाऊन पाहणी करताना लग्नाचा मंडप दिसला. चौकशी करताना समर्पक उत्तरे मिळाली नाहीत. त्यामुळे त्यांनी अतिरिक्त मदत मागविताच रवी विवेक अडसूळ (वय २३) याच्याशी १६ वर्ष १० महिने वय असलेल्या अल्पवयीन मुलीशी बालविवाह झाल्याची माहिती मिळाली. या विवाहाच्या वेळी वरील सर्व हजर होते. त्यामुळे त्यांच्याविरुद्ध गुन्हा नोंदला आहे.
दरम्यान, यातील सहा जणांना पोलिसांनी नोटिसा दिल्या तर यातील विवाहित अल्पवयीन मुलीस तिच्या आईवडिलांच्या ताब्यात देण्यात आले. पुढील तपास हवालदार दत्तात्रय भालेराव करीत आहेत.
----