पंढरपूर-मंगळवेढा पोटनिवडणुकीसाठी भाजपकडून उमेदवार असलेले समाधान आवताडे यांनी २०१४ मध्ये शिवसेनेकडून निवडणूक लढवली होती. तर २०१९ ला ते अपक्ष म्हणून निवडणुकीच्या रिंगणात उतरले होते. दोन्ही निवडणुकीत त्यांना जवळपास ६० हजार मते पडली होती. समाधान आवताडे हे उद्योजक आहेत. या पोटनिवडणुकीत भाजपाकडून आ. प्रशांत परिचारक व समाधान आवताडे यांच्या उमेदवारीसाठी मोठी चुरस होती. मात्र, भाजपच्या वरिष्ठांनी परिचारक यांना थांबविण्यात यश मिळविले आहे.
आमदार परिचारक गटाने समाधान आवताडे यांना पाठिंबा देण्याचे मान्य करीत पंढरपूर शहरासह २२ गावांतून मताधिक्य देण्याचा शब्द पक्षश्रेष्ठींना दिला आहे. त्यामुळेच आवताडेंना भाजपकडून उमेदवारी देण्यात आली आहे. या पोटनिवडणुकीत महाविकास आघाडीकडून भालके कुटुंबातील व्यक्तीला उमेदवारी देण्यात आली आहे. मात्र आघाडीमध्ये फूट पडली असून, शिवसेना व स्वाभिमानीने बंडखोरी करीत उमेदवारी अर्ज दाखल केले आहेत. शिवाय वंचित बहुजन आघाडी, एमआयएम, अभिजित बिचकुले यांच्यासह अनेक अपक्ष उमेदवार रिंगणात असणार आहेत. त्यामुळे या निवडणुकीत मोठी रंगत निर्माण होणार आहे.
आवताडेंसाठी मंगळवारी मोठे नेते पंढरपुरात
परिचारक-आवताडे यांचे मनोमिलन करण्यात यश मिळाल्यानंतर समाधान आवताडे यांचा उमेदवारी अर्ज भरण्यासाठी मंगळवारी विरोधी पक्ष नेते देवेंद्र फडणवीस, प्रदेशाध्यक्ष चंद्रकांत पाटील, माजी खा. विजयसिंह मोहिते-पाटील, माजी मंत्री विजय देशमुख, सुभाष देशमुख, आ. रणजितसिंह मोहिते-पाटील आ. प्रशांत परिचारक, आ. राजा राऊत यांच्यासह बडे नेते उपस्थित राहणार आहेत. त्यानुसार कृषी विभागाच्या हेलिपॅडशेजारील श्रेयस पॅलेस कार्यालयात मेळावा होण्याचीही शक्यता आहे. ते कार्यालय बुकिंग केल्याचे भाजपच्या पदाधिकाऱ्यांनी सांगितले.