भालके समर्थकांकडून कार्यकर्त्याला मारहाणीचा आरोप

पोटनिवडणुकीपूर्वीच पंढरपूरमध्ये पदाधिकारी निवड व विठ्ठल कारखाना यावरून राष्ट्रवादीत मतभेद सुरू आहेत. ते वाद मिटविण्यासाठीच अजित पवार, जयंत पाटील पंढरपूर दौऱ्यावर आले होते. त्यावेळी किरण घोडके हा अजित पवार यांना आपल्या नावावर विठ्ठल कारखान्याने परस्पर २० लाख रुपये कर्ज काढले आहे. याविषयी तक्रार देण्यासाठी आला होता. आमचा उतारा कोरा करून द्यावा, उमेदवारी देताना याचा विचार करावा, अशी मागणी हा कार्यकर्ता करणार होता. त्याआधी भालके यांच्या २० ते २५ समर्थकांनी मारहाण केल्याचा आरोप या कार्यकर्त्याने केला. त्या कार्यकर्त्याला मारहाण झाल्याचे लक्षात येताच विठ्ठलचे संचालक युवराज पाटील, दीपक पावर आक्रमक झाले. त्याचे काहीही चुकीचे नसून जाब विचारण्याचा त्याला अधिकार आहे. भविष्यात शेतकरी, कार्यकर्त्यांची मुस्कटदाबी खपवून घेणार नसल्याचा इशारा युवराज पाटील यांनी दिला आहे. या प्रकारानंतर त्या जखमी कार्यकर्त्याला पोलीस आपल्या व्हॅनमधून घटनास्थळावरून घेऊन गेले. त्यानंतर तणाव निवळला.