जयश्री काशिनाथ बंडगर, जगन्नाथ बाळू माने व अविनाश संजय ढाळे अशी जखमी मेंढपाळांची नावे आहेत.
मेंढपाळ जयश्री बंडगर, जगन्नाथ माने व अविनाश ढाळे हे तिघे रविवारी दुपारी तीनच्या सुमारास विठ्ठल दामोदर गायकवाड यांच्या शेतातून मेंढ्यांना चारापाणी करण्यासाठी नितीन गव्हाणे यांच्या शेतात गेले होते. दरम्यान मेंढ्यांचा चारापाणी झाल्यानंतर सायंकाळी सहाच्या सुमारास परत ठिकाण्यावर जात असताना प्रकाश हरिचंद्र गायकवाड व दिलीप हरिचंद्र गायकवाड यांच्यासह अनोळखी महिलांनी येथून तुम्ही मेंढ्या का घेऊन गेला म्हणून जयश्री बंडगर यांना काठीने मारहाण केली. तिने प्रतिकार करण्याचा प्रयत्न केला असता त्याने डाव्या हाताच्या मनगटाचा चावा घेतल्याने ती मोठ्याने ओरडली. याबाबत जगन्नाथ माने, अविनाश ढाळे यांनी तुम्ही जयश्री बंडगर हिला का मारहाण करीत आहात, अशी विचारणा केली. यावेळी प्रकाशने त्याच काठीने जगन्नाथ याच्या दोन्ही पायाच्या नडगीवर, पायाच्या बोटावर मारहाण केली. तर दिलीप यानेही डोक्यात व उजव्या पायाच्या नडगीवर मारहाण करून जखमी केले. त्यावेळी घरातील इतर अनोळखी महिलांनी तेथे येऊन शिवीगाळ करत मेंढ्यांना दगड मारू लागले. त्यामध्ये एका मेंढीच्या पायास जखम झाली. तर इतर मेंढ्याही जखमी झाल्या. तसेच येथे पुन्हा मेंढ्या घेऊन आलात तर बघून घेईन, अशी दमदाटी केली. याबाबत मेंढपाळ जयश्री बंडगर यांनी दोघांसह अनोळखी महिलांविरुद्ध फिर्याद दाखल केली आहे.