मोहोळ : येथील शिवसैनिकांच्या दुहेरी खून प्रकरणातील आरोपींना सोडविण्यासाठी मदत का करतो असे म्हणून सात जणांनी तलवार, लोखंडी गज आणि काठीच्या सहाय्याने एका तरुणावर प्राणघातक हल्ला केला. याप्रकरणी ७ जणांविरुद्ध मोहोळ पोलिसांत गुन्हा नोंदवला आहे. १६ सप्टेंबर रोजी मोहोळ येथे ही घटना घडली. १८ रोजी गुन्हा नोंदवला.
याबाबत पोलीस सूत्रांकडून मिळालेल्या माहितीनुसार, नवनाथ दगडू गायकवाड (रा. संतपेठ, पंढरपूर) आणि मोहोळ येथील शिवसैनिकाच्या दुहेरी खून प्रकरणात अटकेत असलेले राष्ट्रवादीचे कायकर्ते संतोष सुरवसे व रोहित फडतरे मित्र आहेत. संतोष सुरवसे व रोहित फडतरे यांची जेलमधून सुटका व्हावी यासाठी नवनाथ गायकवाड प्रयत्न करीत आहे. १६ सप्टेंबर रोजी नवनाथ गायकवाड हा पंढरपूरला जाण्यासाठी बसस्थानकासमोर थांबला होता.
यावेळी विकास बनसोडे, विनोद कांबळे, राहुल उर्फ दादा क्षीरसागर, बाळू क्षीरसागर, ऋषी क्षीरसागर, चिम्या बनसोडे, भैय्या क्षीरसागर (सर्व, रा. सिद्धार्थनगर, मोहोळ) या सात जणांनी काठ्या, लोखंडी गज व तलवार घेऊन फिर्यादी नवनाथ गायकवाड याला घेराव घातला. संतोष सुरवसे व रोहित फडतरे यांच्या सोबत का फिरत होता, त्यांनी आमच्या गल्लीतील दोघांचा खून केला आहे, तू त्यांना बाहेर काढण्यासाठी मदत का करतोस’ असे म्हणून त्याला तलवार, लोखंडी गज व काठीने मारहाण करून गंभीर जखमी केले. या प्रकरणी पुढील तपास पोलीस उपनिरीक्षक संतोष माने करीत आहेत.
----
गळ्यातील चेन काढून घेतली
या हल्ल्यात एकाने त्याच्या गळ्यातील सोन्याची चेन काढून घेतली, असेही फिर्यादीत म्हटले आहे. नवनाथ गायकवाड याला सोलापूरच्या शासकीय रुग्णालयामधे दाखल केले होते. दरम्यान, १८ सप्टेंबर रोजी रात्री उशिरा नवनाथ गायकवाड याने दिलेल्या फिर्यादीनुसार वरील सात जणांच्या विरोधात खुनाचा प्रयत्न केल्याचा गुन्हा नोंदवला आहे.
----