सर्वसामान्यांची फरपट

सुट्या पैशांसाठी शोधाशोध : जिल्ह्यात खरेदीसाठी आलेल्यांची कुचंबणा

कणकवली : पंतप्रधान नरेंद्र मोदी यांनी मंगळवारी रात्री ५00 व १000 रुपयांच्या नोटा रद्द करण्याच्या केलेल्या घोषणेमुळे सिंधुदुर्ग जिल्ह्यातील सर्वसामान्यांची चांगलीच फरपट झाली. काही जणांनी बँकांमध्ये धाव घेतली पण बँका बंद असल्यामुळे लोकांना रिकाम्या हाताने घरी परतावे लागले. बाजारपेठेतही लोकांची कुचंबणा झाली. हॉटेल, दुकानदार, वीज मंडळाचे अधिकारी, एस. टी. महामंडळ आदी सर्व ठिकाणी ५00 रुपयांच्या नोटा घेणे बंद केल्यामुळे सर्वसामान्यांना याचा फटका बसला. वीज मंडळाच्या अधिकाऱ्यांनी वीज बिल भरणा करताना ५00 रुपयांच्या नोटा घेणे बंद केले. त्यामुळे वीज बिल भरणाऱ्यांची सुटे पैसे शोधण्यासाठी धावाधाव सुरू झाली. यावेळी ग्राहकांशी बाचाबाचीही झाली. काळा पैसा बाहेर काढण्यासाठी पंतप्रधान नरेंद्र मोदी यांनी लढविलेली शक्कल चांगली आहे, मात्र यामध्ये सर्वसामान्यांची झालेली फरपट संतापजनक असल्यामुळे लोकांनी नाराजी व्यक्त केली. श्रीमंत लोकांनी घरात लपवून ठेवलेला काळा पैसा बाहेर काढण्यासाठी जरी ही शक्कल पंतप्रधान नरेंद्र मोदी व रिझर्व्ह बँकेने शोधली असली तरी यामध्ये सर्वसामान्यच जास्त भरडले गेले आहेत. बँकांचे व्यवहार आणखी काही दिवस सुरळीत होईपर्यंत सर्वसामान्य नागरिकांना त्याचा मोठ्या प्रमाणावर फटका बसणार आहे. त्यामुळे काही प्रमाणात नाराजी व्यक्त होत होती. (वार्ताहर) पेट्रोल पंपावरही गैरसोय पेट्रोल पंपावरही दुचाकीचालकांची गैरसोय झाली. सुटे पैसे कमी पडल्यामुळे ५00 रुपये सुटे देण्याचे पेट्रोल पंपचालकांनी बंद केले. ५00 रुपयांच्या बदली सुटे पैसे मिळणार नाहीत. सरळ ५00 रुपये पेट्रोलची खरेदी करावी, असा नामफलक लावून ठेवल्यामुळे वाहनचालकांचीही गैरसोय झाली.तर काही ठिकाणी ५०० रुपयांच्या बदल्यात पेट्रोल देण्याचे बंद करण्यात आले होते. हॉटेल मालकांचाही पैसे देण्यास नकार ५00 रुपये स्वीकारण्यास हॉटेल मालकांनीही नकार दिल्यामुळे ग्राहक पूर्णत: हैराण झाले. बुधवारी दिवसभर ५00 रुपयांच्या नोटांबाबत जिल्ह्यात चर्चा सुरू होती. बँका अचानक बंद बुधवारी बँकांना सुट्टी दिल्यामुळे संभ्रम आणखीनच वाढला. एटीएमही बंद असल्याचे फलक झळकल्यामुळे सर्वांची तारांबळ उडाली. लोकांना सुटे पैसे मिळेनासे झाल्यामुळे बऱ्याच जणांचे हाल झाले. मेडिकल, पोस्ट, कणकवली उपजिल्हा रुग्णालय या व्यतिरिक्त कोणीही ५00 रुपये स्वीकारत नसल्यामुळे गैरसोय झाली. महिलेस अश्रू अनावर! कणकवली रेल्वे स्टेशनमध्ये रेल्वेतून उतरलेल्या महिलेचे अश्रू अनावर झाले. तिच्याकडे फक्त ५00 रुपयांच्या दोन नोटा होत्या. त्या चालणार नसल्यामुळे आपण घरी कशी पोहोचणार या भीतीने ती महिला घाबरली. अखेरीस सामाजिक कार्यकर्ते संजय मालंडकर यांनी त्या महिलेला १00 रुपयांच्या ५ नोटा देऊन तिची समस्या दूर केली. महिलावर्ग अडचणीत घरखर्च चालविताना नाकीनऊ येणाऱ्या महिलावर्गाची तर या ५00 रुपयांच्या नोटांच्या समस्येने तारांबळ उडाली. सिलेंडरसाठी ठेवलेले ५00 रुपये चालणार नसल्यामुळे अनेक महिला अडचणीत आल्या. एकाएकी मोदींनी घोषणा करून सर्वांनाच बुचकळ्यात पाडले. शासनाने सिलेंडरसाठी पॅनकार्ड व आधारकार्ड पाहिजे अशी अट घातल्यामुळे व आधारकार्ड नसेल तर अनुदान मिळणार नाही, अशी घोषणा केल्यामुळे जशी दाणादाण उडाली होती, त्यापेक्षाही मोठी तारांबळ सर्वांचीच उडाली. ग्राहकांनी पेट्रोलियम उत्पादनाचा अनावश्यक साठा करू नये, १९ पर्यंत नोटा स्वीकारणार देशातील प्रत्येक पेट्रोल व सीएनजी पंप आणि गॅस वितरकांकडे १९ नोव्हेंबर रोजी मध्यरात्रीपर्यंत सर्व प्रकारच्या इंधन व तत्सम उत्पादनाच्या खरेदीसाठी ५00 व १ हजार रूपयांच्या नोटा स्वीकारण्यात येतील. देशभरात सर्व पेट्रोलियम उत्पादने, तेल कंपन्यांच्या वितरण व्यवस्थेद्वारे नियमितपणे उपलब्ध होतील. ग्राहकांनी पेट्रोलियम उत्पादनाचा अनावश्यक साठा करू नये आणि त्यांच्या दैनंदिन अथवा तातडीच्या गरजे इतक्याच पेट्रोलियम पदार्थांची खरेदी करावी. नवीन चलनव्यवस्थेमध्ये सहजरित्या अवस्थांतर होण्याकरिता तेल कंपन्यांना पूर्ण सहकार्य करावे. - इंडियन आॅईल, हिंदूस्थान कॉर्पोरेशन, भारत पेट्रोलियम, तेल कंपन्या, भारत सरकार