बांदा : बांदा शहरातील आळवाडी मार्गावर भर बाजारपेठेत महिलेच्या गळ्यातील सोन्याचे मंगळसूत्र खेचण्याचा प्रयत्न करणार्या योगेश सिध्दु जानकर (२४, रा. कालेली-बंगलेवाडी, ता. कुडाळ) या युवकाला बांदा पोलिसांनी ताब्यात घेतले. ही घटना आज दुपारी १२ वाजण्याच्या सुमारास घडली. याबाबत विणाली विवेक सावंत (रा. बांदा- देऊळवाडी) यांनी बांदा पोलिसांत फिर्याद दाखल केली आहे. बांदा शहरात सोनसाखळी खेचण्याच्या गेल्या काही दिवसांत बर्याच घटना घडल्या आहेत. विणाली सावंत या कट्टा कॉर्नर येथून आळवाडी बाजारपेठेत जात होत्या. आळवाडी मार्गावरील तीन तुळशी येथे योगेश जानकर याने सावंत यांच्या गळ्यातील सोन्याचे मंगळसूत्र खेचण्याचा प्रयत्न केला. मात्र, त्यांनी आरडाओरडा केल्यानंतर स्थानिकांनी योगेश याला पकडून बांदा पोलिसांच्या ताब्यात दिले. योगेश याने मद्यप्राशन केले असल्याने केवळ तोल जाऊन सावंत यांच्या अंगावर पडल्याचे सांगितले. मंगळसूत्र खेचण्याचा आपला हेतू नसल्याचे त्याने स्पष्ट केले. बांदा पोलिसांनी योगेश जानकर याच्यावर गुन्हा दाखल केला आहे. याबाबतचा अधिक तपास बांदा पोलीस करीत आहेत. (प्रतिनिधी)
मंगळसूत्र चोरटा पोलिसांच्या ताब्यात
By admin | Updated: May 31, 2014 01:15 IST