मालवणची ‘फ्लार्इंग क्वीन’ कोकण विभागात द्वितीय

राज्यस्तरीय फेरीसाठी निवड : महाविद्यालयीन स्तरावर प्रतिष्ठेची पुरुषोत्तम करंडक स्पर्धा

मालवण : महाविद्यालयीन स्तरावर प्रतिष्ठेची स्पर्धा म्हणून ओळखली जाणाऱ्या पुरुषोत्तम करंडक स्पर्धेत येथील स. का. पाटील सिंधुदुर्ग महाविद्यालयाच्या विद्यार्थ्यांनी यश संपादन केले आहे. रत्नागिरी येथे झालेल्या कोकण विभागीय फेरीत महाविद्यालयाच्या ‘फ्लार्इंग क्वीन’ या एकांकिकेला द्वितीय क्रमांक प्राप्त झाला आहे. या स्पर्धेची राज्यस्तरीय फेरी जानेवारी महिन्यात पुणे येथे होणार आहे. पुरुषोत्तम करंडक स्पर्धेत विद्यार्थ्यांनी यश संपादन केल्याबद्दल सर्वत्र अभिनंदन होत आहे. महाविद्यालयाच्यावतीने प्राचार्य डॉ. श्रीरंग मंडले यांच्या उपस्थितीत सहभागी विद्यार्थ्यांचा सत्कार करण्यात आला. रत्नागिरी येथील सावरकर नाट्यगृहात पुरुषोत्तम करंडक स्पर्धेची विभागीय फेरी झाली. या स्पर्धेत सिंधुदुर्ग व रत्नागिरी जिल्ह्यातील १६ महाविद्यालयांनी सहभागी झाले होते. महाविद्यालयाच्या विद्यार्थ्यांनी संजय पवार लिखित ‘फ्लार्इंग क्वीन’ ही एकांकिका सादर केली. यात निखिला घाडीगावकर, विधिता मोंडकर, माधुरी मेस्त्री, वैभव खोबरेकर, राहुल जाधव, तुषार हिर्लेकर, पलाश चव्हाण, प्रथमेश सरंबळकर, कोमल जोशी, प्रगती मुळीक या विद्यार्थ्यांनी सहभाग घेतला. यांना विशाल राऊत, देवानंद दुखंडे, रोहित कांबळे, विवेक जाधव, विश्राम कदम, रोहन कदम आदींचे सहकार्य लाभले.पुणे येथे होणाऱ्या राज्यस्तरीय फेरीसाठी या एकांकिकेची निवड करण्यात आली आहे. विद्यार्थ्यांचे नेतृत्व डॉ. उज्वला सामंत, भक्ती मेस्त्री, कैलास राबते, नंदन पाटील यांनी केले. विद्यार्थ्यांना स्पर्धेच्या रंगीत तालीमेसाठी नगरपरिषदेच्यावतीने मामा वरेरकर नाट्यगृह विनामोबदला उपलब्ध करून दिल्याबद्दल पालिकेचे महाविद्यालयाच्यावतीने आभार मानण्यात आले. विजेत्या विद्यार्थ्यांचे प्राचार्य डॉ. श्रीरंग मुंडले यांच्या उपस्थितीत अभिनंदन करण्यात आले. (प्रतिनिधी)