कुणकेरीत प्रेमीयुगुलाची आत्महत्या

प्रेमाच्या विरोधामुळे केले कृत्य : एकाच दोरीने संपविला जीव; घटनेने सावंतवाडीत हळहळ

सावंतवाडी : कुणकेरी वनविभाग कार्यालयाच्या मागील बाजूच्या सुमारे ५०० मीटर परिसरातील जंगलात प्रेमीयुगुलाने एकाच दोरीच्या सहायाने झाडाला गळफास घेऊन आत्महत्या केली. प्रेमप्रकरणासह लग्नाला विरोध झाल्याने त्यांनी हा निर्णय घेतला असावा, असा संशय पोलिसांनी व्यक्त केला आहे. ‘एक दुजे के लिए’ जगू पाहणाऱ्या या युगुलाने चित्रपटातील दृश्याप्रमाणे जीवन संपविले आहे. हा प्रकार गुरुवारी सकाळी ११ वाजण्याच्या सुमारास उघडकीस आला. कोलगाव-पांडवनगरी येथील वैभवी बाबूराव चव्हाण (वय २१) व सावंतवाडी माठेवाडा येथील नागेश गोसावी (१९) अशी या दोघांची नावे आहेत. घटनास्थळी सापडलेल्या कीटकनाशक व पाण्याच्या बाटलीमुळे आत्महत्येपूर्वी दोघांनी कीटकनाशक प्राशन केल्याचा अंदाज व्यक्त होत आहे. दोघांचेही मृतदेह कुजलेल्या अवस्थेत होते. गेले आठ दिवस वैभवी चव्हाण घरातून बेपत्ता असल्याची तक्रार वडील बाबूराव चव्हाण यांनी पोलिस ठाण्यात दिली होती. त्यांनी घटनास्थळी येऊन मृतदेहाची ओळख पटविल्याने अखेर या प्रकाराचा उलगडा झाला. यावेळी त्यांनी मुलीचा मृतदेह पाहून एकच हंबरडा फोडला. त्यानंतर त्या ठिकाणी आलेल्या पोलिस निरीक्षक शंकर पाटील व अन्य सहकाऱ्यांनी झाडावर असलेले मृतदेह खाली उतरवून शवविच्छेदन करण्यासाठी सावंतवाडी उपजिल्हा रुग्णालयात नेले. कुणकेरी-कोलगाव सीमेवर असलेल्या जंगलात गस्त घालत असताना वनविभागाचे कर्मचारी शांताराम गावडे यांना झाडाला लटकलेल्या अवस्थेत दोन कुजलेले मृतदेह दिसून आले, त्यांनी याबाबतची माहिती माजगाव वनपाल चंद्रसेन धुरी यांना पोलिसांनी दिल्यानंतर पोलिसांनी घटनास्थळी धाव घेतली. घटनास्थळी कुजलेल्या अवस्थेतील मृतदेहामुळे दुर्गंधी पसरली होती. सावंतवाडी पोलिस ठाण्याचे सहायक पोलिस निरिक्षक अरुण जाधव व त्यांचे सहकारी राजेंद्र गवस, डुमिंग डिसोझा, दीपाली सावंत, आदी दाखल झाले. घटनास्थळावर त्यांनी पाहणी केल्यानंतर त्यांना कीटकनाशक असलेले पाकीट, दोन पाण्याच्या बाटल्या आणी एक मोडलेल्या सीमकार्डचा भाग अशा वस्तू आढळून आल्या. मात्र, या व्यतिरिक्त अन्य काही तेथे नसल्याने मृतदेहांची ओळख पटविण्याचे आव्हान पोलिसांसमोर उभे राहिले होते.यावेळी पंचायत समिती सभापती प्रमोद सावंत, पंचायत समिती सदस्य महेश सारंग, मायकल डीसोझा, मेघश्याम काजरेकर, संदीप राणे, संदीप परब, पप्पू सावंत, प्रमोद गावडे, पप्पू ठीकार, अनिल नाईक, बाबा राऊळ आदींनी मदतकार्यात सहभाग घेतला. त्या ठिकाणी केलेल्या तपासणीत युवकाच्या पॅन्टमध्ये मोबाईल आढळून आला. नागेश आणि वैभवी या दोघांची सहा महिन्यांपासून ओळख होती. नागेश हा बसस्थानक परिसरातील एका वडापाव सेंटरवर काम करीत होता. त्या ठिकाणी त्याची वैभवी हिच्याशी ओळख झाली. वैभवी माडखोल येथील कृषी विद्यापिठात प्रथम वर्षात शिक्षण घेत होती. त्यामुळे दोघांची नेहमी भेट होत असे. त्यातून हे प्रेमप्रकरण सुरू झाले. दरम्यान, दोघेही अल्पवयीन असल्यामुळे त्यांना समज देण्याची मागणी चव्हाण यांच्याकडून पोलिसांकडे करण्यात आली होती. मात्र, बुधवार १२ आॅक्टोबर रोजी सकाळी कॉलेजमध्ये जाते असे सांगून वैभवी गेली ती घरी परतली नसल्यामुळे चव्हाण यांनी पोलिसांत ती बेपत्ता असल्याची तक्रार दिली होती. आठ दिवसानंतर गुरूवारी दोघांचा मृतदेह आढळून आल्याने परिसरात खळबळ उडाली. याबाबत सावंतवाडी पोलिस ठाण्यात आकस्मिक मृत्यूची नोंद करण्यात आली आहे. (वार्ताहर) ‘जीवन की डोर, एकही ओर’ या युगुलाला अगोदर समजाविण्याचा प्रयत्न करण्यासाठी पोलिसांना सांगण्यात आले होते. या विरोधातूनच त्यांनी एकमेकांसाठी एकाच दोराने जीवन संपविले. वजन तागडीप्रमाणे समसमान अंतरावर दोघांचेही मृतदेह लटकत होते. चव्हाण कुटुंबीयांना दुसरा हादरा यातील मृत वैभवी हिच्या आजी-आजोबांनी तीन वर्षांपूर्वी आजारपणाला कंटाळून अशाचप्रकारे घराच्या पडवीत गळफास घेऊन एकाच वेळी जीवन संपविले होते. असाच काहीसा प्रकार पुन्हा घडल्याने चव्हाण कुटुंबीयांना पुन्हा धक्का बसला आहे. तर नागेश याच्या आईचे दुर्धर आधाराने निधन झाले होत. तो एकटाच माठेवाडा भागात राहत होता. त्याला एक बहीण असून, ती निवारा केंद्रात आहे.