सिंधुदुर्ग: ओटवणे जंगलात जखमी अवस्थेत आढळला गवा, लोकवस्तीत येण्याची भिती

जखमी गवा जंगलातून बाहेर लोकवस्तीत आल्यास कोणाला तरी इजा करेल या भितीने ग्रामस्थांमध्ये खळबळ

सावंतवाडी : तालुक्यातील ओटवणे मांजरधारा येथील जंगलात गवा जखमी अवस्थेत ग्रामस्थांच्या दृष्टीस पडल्यामुळे परिसरात भीतीचे वातावरण पसरले आहे. जखमी गवा जंगलातून बाहेर लोकवस्तीत आल्यास कोणाला तरी इजा करेल या भितीने ग्रामस्थांत खळबळ उडाली आहे.याबाबत ग्रामस्थांनी वनविभागाला माहिती दिली असून वनकर्मचारी वनपाल प्रमोद सावंत, वनरक्षक महादेव गेजगे यांनी तात्काळ घटनास्थळी धाव घेतली. वनकर्मचाऱ्यांनी जंगलात शोधाशोध केली असता त्यांना हा गवा दृष्टीस पडला. त्याच्या पायाला दुखापत झाली आहे. त्याला चालता येत नाही अशातच तो रौद्ररूप धारण करतो यामुळे वनविभाग त्याच्यावर पाळत ठेवून आहे.जखमी गवा जंगलात ठिकठिकाणी बसून असतो. पण गवा वस्तीनजीक आल्यास ग्रामस्थांनी दक्षता घ्यावी, असे आवाहन वनविभागामार्फत करण्यात आले आहे. अलिकडेच गव्याने मारहाण केल्याच्या अनेक घटना उघडकीस आल्या आहेत. त्यामुळे वनविभाग सर्तक आहे.