रत्नागिरी : जिल्ह्यात दि. १८ जानेवारी व २२ फेब्रुवारी रोजीच्या पल्स पोलिओ लसीकरणाचा लाभ जिल्ह्यातील १ लाख ४ हजार ४८५ एवढ्या ० ते ५ वर्षे वयोगटातील मुलांना मिळणार आहे. यासाठी जिल्ह्यात शहरी भागामध्ये १३१ व ग्रामीण भागामध्ये १८२७ अशी एकूण १९५८ लसीकरण केंद्र स्थापन करण्यात आलेली आहेत. या ठिकाणी एकूण ४,३०५ कर्मचाऱ्यांची लसीकरणासाठी नियुक्ती करण्यात आली असून, १२५ वाहने या मोहीमेसाठी अधिग्रहीत करण्यात आलेली आहेत.बसस्थानक, रेल्वे स्थानक येथेही पोलिओ लसीकरणाची मोफत सोय करण्यात आली आहे. या ठिकाणी १४९ ट्रान्झीट टीम तसेच १५५ मोबाईल टीम तैनात करण्यात आल्या आहेत. ही मोहीम १०० टक्के यशस्वी करण्यासाठी जिल्हा, तालुका व गावपातळीवर समन्वय समित्या स्थापन करण्यात आल्या आहेत. जिल्ह्यातील सर्व आरोग्य कर्मचारी व वैद्यकीय अधिकारी तसेच लसीकरण केंद्रावरील कर्मचारी यांना प्रशिक्षण देण्यात आले आहे.पल्स पोलिओ लसीकरण मोहीमेमध्ये एकही बालक पोलिओ लसीकरणापासून वंचित राहणार नाही. यासाठी संपूर्ण नियोजन करण्यात आले आहे. ही मोहीम यशस्वी होण्यासाठी सर्व इतर संस्थांचा सहभाग व सहकार्य अपेक्षित आहे. त्यासाठी लायन्स क्लब, रोटरी क्लब, आय. एम. ए., नेहरु युवा केंद्र, आकाशवाणी जिल्हा माहिती कार्यालय, शिक्षण विभाग यांचे सहकार्य घेण्यात आले आहे. पल्स पोलिओ लसीकरण मोहीम प्रभावीपणे राबविण्यासाठी जिल्हा यंत्रणा सज्ज झाली आहे. आपल्या कुटुंबातील ० ते ५ वर्षे वयोगटातील सर्वांना दिनांक १८ जानेवारी व २२ फेब्रुवारी रोजी सकाळी ८ ते सायंकाळी ५ वाजेपर्यंत नजीकच्या लसीकरण केंद्रावर जाऊन पोलिओ डोस पाजून घ्या, बाळ आजारी असले तरी किंवा यापूर्वी पोलिओ डोस दिला असला तरीही पोलिओ डोस पाजून घ्यावा, असे आवाहन आरोग्य अधिकारी डॉ. विनीत फाळके यांनी केले आहे.ही मोहीम यशस्वी होण्यासाठी जिल्ह्यातील सर्व स्वयंसेवी संस्था, पदाधिकारी, अधिकारी, कर्मचारी, प्रसिद्धी माध्यम यांना सहकार्य करावे, असे आवाहन जिल्हा परिषद अध्यक्ष जगदीश राजापकर, मुख्य कार्यकारी अधिकारी विजय काळम, आरोग्य समिती सभापती डॉ. अनिल शिगवण, जिल्हा आरोग्य अधिकारी डॉ. विनीत फाळके यांनी केले आहे. (प्रतिनिधी)
लसीकरणाचा १ लाख बालकांना मिळणार लाभ
By admin | Updated: January 10, 2015 00:23 IST