सातारा : एकीकडे कोरोनाचे रुग्ण कमी होत असतानाच पावसाळ्याच्या पार्श्वभूमीवर आता झिका व्हायरसचा धोका निर्माण झाला आहे. आरोग्य विभागाकडून गावोगावी फवारणी करण्यात येणार आहे. परंतु सध्या सातारा जिल्ह्यात झिका व्हायरसचा एकही रुग्ण नसल्याचे आरोग्य विभागाकडून सांगण्यात आले.
महाबळेश्वरमधून गेल्या काही महिन्यांपूर्वी वटवाघळाचे नमुने प्रयोगशाळेत तपासणीसाठी नेण्यात आले होते. त्यामध्ये झिका व्हायरस आढळून आला होता. या पार्श्वभूमीवर खबरदारी म्हणून राज्य शासनाने प्रत्येक जिल्ह्याच्या आरोग्य विभागाला सतर्कतेचे आदेश दिले आहेत. आरोग्य विभागाकडून गावोगावी औषध फवारणी करण्यात येणार आहे. वटवाघूळमधील झिका व्हायरस अद्याप माणसाच्या शरीरामध्ये गेला नसल्याचे वैद्यकीय अधिकाऱ्यांनी सांगितले. अशा प्रकारचा सातारा जिल्ह्यात एकही रुग्ण नाही. त्यामुळे केवळ खबरदारी म्हणून आरोग्य विभाग सतर्क झाला आहे.
चौकट : झिका व्हायरसची लक्षणे
झिका आजाराची बहुसंख्य रुग्णांमध्ये कोणतीही लक्षणे आढळत नसली तरी झिका आजाराची लक्षणे सर्वसाधारणपणे डेंग्यू आजारासारखी असतात. त्यामध्ये ताप, अंगावर रॅश उमटणे, डोळे येणे, सांधे व स्नायुदुखी, थकवा आणि डोकेदुखी यांचा समावेश होतो. ही लक्षणे सर्वसाधारणपणे सौम्य स्वरूपाची असतात आणि ती २ ते ७ दिवसांपर्यंत राहतात. झिका आजारासाठी रुग्णालयामध्ये भरती होण्याची फारशी आवश्यकता भासत नाही. तसेच या आजारात मृत्यूचे प्रमाणही नगण्य आहे.
चौकट : कशामुळे होतो?
झिका हा डासांमार्फत पसरणारा एक विषाणूजन्य आजार असून, तो १९४७ साली युगांडा देशातील काही माकडांमध्ये आढळला. त्यानंतर १९५२ साली युगांडा आणि टांझानिया देशात हा आजार प्रथमच माणसांमध्ये दिसून आला. झिका विषाणू हा फॅलिव्हायरस प्रजातीचा असून, तो एडिस डासांमार्फत पसरतो. सध्या केरळमध्ये झिकाचे १३ दूषित रुग्ण आढळून आल्याने पुन्हा एकदा धोक्याची बाब निर्माण झालेली आहे.
चौकट : उपाययोजना काय?
ताप उद्रेक झालेल्या गावात व आजुबाजूच्या ५ किमी परिसरातील सर्व गावातील साठवलेल्या पाण्याचे साठे दर आठवड्यातून एकदा रिकामे करणे गरजेचे आहे. तसेच डासोत्पत्ती स्थाने नष्ट करावीत. साठवलेल्या पाण्याचे साठे आठवड्याला रिकामे करता येत नाहीत, अशा पाण्याच्या साठ्यात टेमिफॉस (अबेट) या अळीनाशकाचा वापर योग्य प्रमाणात करावा. घरातील पिण्याच्या पाण्याच्या साठ्यात टेमिफॉसचा वापर करू नये.
कोट : झिका व्हायरसचा धोका अद्याप आपल्या सातारा जिल्ह्यात नाही. मात्र, खबरदारी म्हणून आरोग्य विभागाकडून उपाययोजना केल्या जात आहेत. नागरिकांनी घाबरून जाऊ नये.
डॉ. सचिन पाटील, प्रभारी जिल्हा आरोग्य अधिकारी, सातारा