सणबूर : पाटण तालुक्यातील ढेबेवाडी विभागात सध्या वानर, तरस, लांडगा, रानडुक्कर यांचा उपद्रव वाढला आहे. प्राण्यांकडून पिकांचे नुकसान होत आहे. प्राण्यांना हुसकावण्यासाठी ग्रामस्थांना पिकांची राखण करावी लागत असून, वन विभागाने वन्यप्राण्यांचा बंदोबस्त करण्याची मागणी होत आहे.
रस्त्याकडेला पार्किंग
पाटण : नो-पार्किंगचे फलक असतानाही शहरात ठिकठिकाणी वाहनधारकांकडून बिनधास्तपणे नियमांचे उल्लंघन होत आहे. अनेकदा वाहने नो-पार्किंगमध्ये पार्क केली जात आहेत. त्यामुळे वाहतूक कोंडीची समस्या निर्माण होत असून, नागरिकांना त्रास सहन करावा लागत आहे. नियमबाह्य पार्किंग करणाऱ्यांवर कारवाई करण्याची गरज आहे.
गटाराची दुरवस्था
कऱ्हाड : येथील कृष्णा नाक्यावर रस्त्याकडेला असणाऱ्या गटाराची दुरवस्था झाली आहे. या गटारावर मोठ्या प्रमाणात गवत वाढले असून, कचराही साचला आहे. गटारातील दुर्गंधीयुक्त पाणी रस्त्यावर येत आहे. गटारात साचणारा कचरा पालिकेच्या सफाई कर्मचाऱ्यांनी काढण्याची मागणी नागरिकांकडून होत आहे.
पथदिव्यांची गरज
मलकापूर : मलकापुरातील भाजी मंडई ते कृष्णा रूग्णालय परिसरात उपमार्गावर महिलांची नेहमीच वर्दळ असते. या परिसरात पथदिव्यांची कोणतीही सोय नसल्याने अनेकवेळा अनुचित प्रकार घडतात. यापूर्वी धूमस्टाईल चोरट्यांनी दागिने लंपास केल्याच्या घटना घडल्या आहेत. अशा घटना घडू नयेत, यासाठी पथदिव्यांची सोय करणे गरजेचे आहे़