दत्तक गावांचा पाणीप्रश्न स्वनिधीतून मार्गी !

शशिकांत शिंदेंचा उपक्रम : देऊरला टँकरने पाणीपुरवठा सुरू करून पालकत्व दाखविले

वाठार स्टेशन : आमदार आदर्श ग्राम योजनेत पालकत्व स्वीकारलेल्या देऊरकरांना शासन देत असलेले पाणी अपुरे पडत असल्यामुळे या गावाच्या पाण्यासाठी पुढाकार घेत आता कोरेगावचे आमदार शशिकांत शिंदे यांनी स्वनिधीतून १२ हजार लिटर क्षमतेचा १ टँकर सुरू करून खऱ्या अर्थाने पालकत्वाची भूमिका पार पाडली आहे.शासनाच्या टंचाईच्या निकषानुसार माणसी २० लिटर पाणी शासनाकडून उपलब्ध होणे गरजेचे आहे. देऊरची सध्याची लोकसंख्या ४ हजार १२५ एवढी असल्याने गावाला दररोज ८० हजार लिटर पाण्याची आवश्यकता आहे, असे असतानाही शासनाकडून केवळ ४८ हजार लिटर पाणी दिले जात आहे. शासनाचे हे पाणी अपुरे पडत असल्यामुळे देऊरकरांनी आमदार शिंदे यांच्याकडे पाण्यासाठी पाठपुरावा केला. यावर शासनाची वाट न बघता आमदार शशिकांत शिंदे यांनी स्वनिधीतून १२ हजार लिटर क्षमतेचा एक टँॅकर आता सुरू केला असून, हा टँकर दररोज १ खेप देऊरकरांना देणार असून, यानंतर तो भागातील बनवडी, अंबवडे (सं) वाघोली, रेवडी, तांबी, कोलवडी व गुजरवाडी या गावांनाही पाणीपुरवठा करणार आहे. देऊर गावास सध्या सहा दिवसांतून एक वेळ पाणीपुरवठा केला जात आहे. गावच्या स्वजलधारा योजनेच्या विहिरीतही अत्यल्प पाणी आहे तर नव्याने वसना नदी पात्रात काढलेल्या विहिरीतील पाणीसाठा ही कमी झाल्याने गावाला पाण्याची मोठीटंचाई जाणवत आहे. गावच्या पाण्यासाठी ग्रामस्थांनी अखेर शासनाकडे पाणी टँकर सुरू करण्याबाबत मागणी केली. यावर शासनाने २४ हजार लिटर क्षमतेच्या एका टँकरच्या दोन फेऱ्या म्हणजेच ४८ हजार लिटर पाणी सुरू केले आहे. आमदार शिंदे यांच्या माध्यमातून दररोज १२ हजार लिटर पाणी उपलब्ध होणार आहे. या पाणी टॅकरचे विधिवत पूजन देऊर या ठिकाणी कोरेगाव कृषी उत्पन्न बाजार समितीचे सभापती अजय कदम व राष्ट्रवादी (युवक) चे कोरेगाव तालुकाध्यक्ष निलेश जगदाळे यांच्या हस्ते व देऊरच्या सरपंच निलिमा कदम, उपसरपंच बाळकृष्ण कदम, धनसिंग कदम, जि.प सदस्य राहुल कदम सर्व सदस्य व ग्रामस्थ उपस्थित होते. गावास स्वतच्या बोअरवेलचे पाणी उपलब्ध केल्यबद्दल अजित कदम यांचा ग् सन्मान करण्यात आला. (प्रतिनिधी)