सातारा : सातारा नगरपालिकेचे मुख्याधिकारी अभिजित बापट यांची पिंपरी- चिंचवड महापालिकेच्या उपायुक्तपदी पदोन्नतीने बदली झाली आहे. तर भोरचे मुख्याधिकारी डॉ. विजयकुमार थोरात यांची सातारा पालिकेच्या मुख्याधिकारी वर्णी लागली आहे. त्यांनी यापूर्वी शिरूर, दौंड व भोर पालिकेत मुख्याधिकारी म्हणून काम केले असून, आता सातारा पालिकेची सूत्रे त्यांच्या हाती सोपविण्यात आली आहेत.
खासदार उदयनराजे भोसले व आमदार शिवेंद्रसिंहराजे भोसले यांच्याशी प्रशासकीय कामकाजाचा उत्तम समन्वय असणारे अभिजित बापट यांची सोलापूर महापालिकेतून साताऱ्यात दि. १२ ऑगस्ट २०२० रोजी मुख्याधिकारी म्हणून बदली झाली होती. सोलापूर उपायुक्तपदाची जबाबदारी नाकारणाऱ्या अभिजित बापट यांना साताऱ्यात आणण्यासाठी मोठी राजकीय मोर्चेबांधणी झाल्याने तत्कालीन मुख्याधिकारी रंजना गगे यांना पुणे महानगरपालिकेत बदलून जावे लागले. कोरोनाचा संक्रमणकाळ, प्रशासकीय कामांना गती देण्याचा प्रयत्न, नगरोत्थानच्या निधीसाठी विकासकामांचे नवीन प्रस्ताव सुरू असताना मुख्याधिकारी अभिजित बापट यांची पिंपरी-चिंचवड महापालिकेच्या उपायुक्तपदी तात्पुरत्या स्वरूपात पदोन्नतीने वर्णी लागल्याचा लेखी आदेश नगरविकास विभागाला शुक्रवारी उशिरा प्राप्त झाला आहे. संबंधितांना तत्काळ कार्यमुक्त करावे, अशा सूचना जिल्हाधिकाऱ्यांना करण्यात आल्या आहेत.
अभिजित बापट यांनी २०१२ ते १६ यादरम्यान जिल्हा प्रकल्प संचालक व सातारा पालिका मुख्याधिकारी अशी सलग सेवा बजाविली. साताऱ्याच्या विविध प्रश्नांचा त्यांचा सखोल अभ्यास होता, मात्र साताऱ्यात रुळण्यापूर्वीच त्यांची रवानगी पुण्याला झाली.
बापट यांची बदली झाल्याने भोरचे मुख्याधिकारी डॉ. विजयकुमार थोरात यांच्याकडे सातारा पालिकेची सूत्रे सोपविण्यात आली आहेत. कर्मचाऱ्यांना सांभाळून घेणारा व प्रशासनावर वचक असणारा अधिकारी म्हणून थोरात यांची ओळख आहे. त्यांनी यापूर्वी शिरूर, दौंड व भोर पालिकेत मुख्याधिकारी म्हणून काम केले आहे. सातारा पालिका नेहमीच कोणत्या ना कोणत्या कारणाने चर्चेचा विषय ठरली आहे. असे असले तरी डॉ. विजयकुमार थोरात यांच्या अनुभवाचा सातारा पालिकेला कितपत फायदा होतो हे पाहणे आता औत्सुक्याचे ठरणार आहे.