उंब्रजच्या रणरागिणीने घडवली चोरट्यांना अद्दल

लोकमत न्यूज नेटवर्कउंब्रज : बहाणा करून बंगल्यात शिरलेल्या पाच चोरट्यांनी आयफोन पळविला; मात्र सहा महिन्याच्या बाळाला घरातच ठेवून धाडसी सुनेनं मोपेडवरून पाठलाग करत चोरट्यांचा शोध घेतला. ऊसाच्या फडात लपून बसलेल्या एका चोरट्याला पकडून अखेर पोलिसांच्या ताब्यातही दिलं. या रणरागिणीचे नाव आहे नाजिया नायकवडी-शेख. त्या सांगली-मिरज-कुपवाड महापालिकेच्या विद्यमान नगरसेवक आहेत. नाजिया यांचे माहेर मिरज असून उंब्रज सासर आहे. दरम्यान, याप्रकरणी अल्पवयीन चार युवकांविरुद्ध पोलिसांत गुन्हा दाखल झाला आहे.रविवारी दुपारी एक वाजण्याच्या सुमारास भीक मागण्याचे नाटक करून चार ते पाच मुलांनी उंब्रज येथील सुरभी चौकात राहणाºया चाँद शेख यांच्या बंगल्याचे दार वाजवले. नाझीया सूरज शेख (नायकवडी) यांनी दरवाजा उघडला. ‘काही नाही,’ असे सांगून पुन्हा दरवाजा बंद करत त्या आतील खोलीत निघून गेल्या. त्यानंतर चोरट्यांनी लोखंडी दरवाजाच्या ग्रीलमधून हात घालून हळूच दरवाजा उघडला अन् आत असलेला आयफोन घेऊन पलायन केले.दरम्यान, दरवाजा वाजल्याने नाझीया पटकन बाहेर आल्या. तेव्हा फोन चोरीस गेल्याचे त्यांच्या लक्षात आले. त्या बंगल्यातून बाहेर आल्या. तोपर्यंत संबंधित चोरटे समर्थनगरकडे पळत गेले होते. त्यांनी पटकन आपली मोपेड बाहेर काढून त्यांचा पाठलाग केला. चोरटे जाधव मळ्याच्या बाजूकडील ऊसाच्या शेतात शिरले. नाझीया यांनी रस्त्यावर गाडी लावली. अन स्वत:ही ऊसाच्या शेतात शिरल्या. चोरट्यांपैकी एक जण ऊसाच्या सरीत झोपला होता. त्याला त्यांनी तेथेच पकडले अन् चोरट्यांनी बाजूला फेकून दिलेला मोबाईलही हस्तगत केला.इतर चोरटे फरारया घटनेनंतर परिसरातील नागरिक गोळा झाले. यामुळे इतर चोरटे ऊसातून दुसºया दिशेने पळून गेले. त्यानंतर नाझीया यांनी उंब्रज पोलिस ठाण्यात फोन करून संबंधित चोरट्यास पोलिसांच्या स्वाधीन केले.विशेष म्हणजे, नाझीया यांना सहा महिन्यांचे बाळ आहे. चोरी झाल्यानंतर बाळाला घरात ठेवूनच धाडसाने पाठलाग करत चोरट्याला मुद्देमालासह पकडण्याचे जे धाडस त्यांनी दाखविले, त्याबद्दल ग्रामस्थांनी त्यांचे कौतुक केले.