लोणंद : लोणंद-शिरवळ मार्गावर मंगळवारी रात्री आठच्यासुमारास वाठार कॉलनी फाटा येथे ट्रकने दुचाकीस पाठीमागून जोराची धडक दिली. यामध्ये दुचाकीस्वाराचा जागीच मृत्यू झाला. शिवाजी श्रीरंग साळुंखे असे मृत्यू झालेल्या चालकाचे नाव आहे.
लोणंद पोलिसांनी दिलेली माहिती अशी की, शिवाजी श्रीरंग साळुंखे (वय ६०, रा. भादे) हे दुचाकी (एमएच ११ एक्यू ६४४८) वरून वाठार कॉलनीहून भादे येथे जात असताना वाठार कॉलनी येथील शिरवळ रोडवरील फाट्याजवळ भरधाव वेगाने आलेल्या ट्रक (एमएच १२ एचडी ३९७६) याने पाठीमागून जोरदार धडक दिली. धडक देऊन त्यांच्या अंगावरून ट्रक गेल्याने त्यांचा जागीच मृत्यू झाला. धडक दिल्यानंतर ट्रकचालकाने ट्रक तेथेच सोडून पळ काढला. ट्रकचालकाविरोधात गुन्हा दाखल करण्यात आला आहे. लोणंदचे सहायक पोलीस निरीक्षक विशाल वायकर तपास करीत आहेत.
140921\20210914_172734.jpg
लोणंद शिरवळ रोडवर ट्रकची दुचाकीला जोरदार धडक, एक ठार