वडूज : गुरसाळे (ता. खटाव) हद्दीत डंपरने दिलेल्या धडकेत दुचाकीस्वाराचा मृत्यू झाला. किरण सदाशिव जाधव (वय २१, रा. गुरसाळे), असे मृत युवकाचे नाव आहे. या अपघाताची वडूज पोलीस ठाण्यात नोंद झाली आहे.
याबाबत पोलिसांकडून मिळालेली माहिती अशी की, गोपूज ते गुरसाळे रस्त्यावर रविवार, दि. ७ रोजी दुपारी अडीचच्या सुमारास बळीराम महादेव वाघ यांच्या द्राक्ष बागेशेजारी गुरसाळे गावाकडे दुचाकीवर (एमएच ११ सीएम ९१४५) निघालेला किरण सदाशिव जाधव यास पाठीमागून भरधाव वेगात आलेल्या पिवळ्या रंगाच्या डंपर (एमएच १० झेड ४६९५) ने धडक दिली. त्यामध्ये किरण जाधव हा गंभीर जखमी झाला. जखमी किरण यास हसन शिकलगार, प्रताप जाधव, गणेश राऊत यांनी पुढील उपचारासाठी येथील ग्रामीण रुग्णालयात आणले. मात्र, उपचारापूर्वीच किरणचा मृत्यू झाल्याचे सांगण्यात आले.
अपघातानंतर डंपर चालकाने पलायन केले. याबाबत विश्वासराव लक्ष्मण जाधव (रा. गुरसाळे) यांनी पोलीस ठाण्यात फिर्याद दिली.
अपघातास कारणीभूत ठरलेला डंपर (एमएच १० झेड ४६९५) वडूज पोलिसांनी ताब्यात घेतला. वडूज पोलीस ठाण्यात गुन्हा दाखल झाला आहे. पोलीस हवालदार शांतीलाल ओंबासे तपास करीत आहेत.