सातारा : जिल्ह्यात सलग दोन वर्षे दमदार पाऊस झाला. तसेच जलसंधारणाच्या कामामुळे पाणीसाठे टिकून राहत असल्याने यंदा मार्च महिन्याच्या अखेरीस जिल्ह्यात टँकर सुरू झाला. सध्या जिल्ह्यातील ४ तालुक्यांत टँकरने पाणीपुरवठा सुरू आहे. यावर ६ गावे आणि १० वाड्यांतील ७ हजार नागरिक अवलंबून आहेत. तसेच पशुधनालाही टँकरचाच आधार आहे.
जिल्ह्यात तीन-चार वर्षांतून दुष्काळ पडतो. त्यातच पाऊस होऊनही माण, खटावसारख्या तालुक्यांत डिसेंबर, जानेवारी महिना उजाडताच टँकर सुरू करावे लागायचे. पण, गेल्या काही वर्षांत हे चित्र बदललंय. याला कारण म्हणजे जलसंधारणाची झालेली कामे. त्याचबरोबर वॉटर कप स्पर्धेमुळे तर पाणी साठवण्याचं तुफान आलेलं. माण, खटाव आणि कोरेगाव या तालुक्यांत जलसंधारणाची मोठी कामे झाली आहेत. त्यामुळे पावसाचं पडलेलं पाणी अडून राहिलं व त्याचा फायदाही टंचाई निवारणासाठी झाला आहे.
जिल्ह्यात दोन वर्षांपासून दमदार पाऊस होत आहे. २०१९ आणि २०२० या दोन वर्षांत सरासरीहून अधिक पाऊस झाला. त्यामुळे यंदा उन्हाळ्यात टंचाईची स्थिती एकदम कमी राहणार असल्याचे समोर येऊ लागले आहे. याबाबत जिल्हा प्रशासनाने संभाव्य टंचाई आराखडा तयार केला आहे. ऐन उन्हाळ्यात जिल्ह्यातील १६९ गावांना आणि २२६ वाड्यांत टंचाई भासू शकते. पण, यामधील १३८ गावांनाच टंचाईचा सामना करावा लागण्याचा अंदाज आहे. यासाठी ४६ टँकर लागू शकतात. त्यासाठी जवळपास अडीच कोटींचा खर्च अपेक्षित आहे. मात्र, उन्हाळा संपत आलातरी अजूनही मोठ्या प्रमाणात टँकर सुरू नाहीत.
गेल्या वर्षी मार्च महिन्याच्या मध्यावर जिल्ह्यातील पहिला टँकर खटाव तालुक्यात सुरू झाला होता. त्यानंतर टप्प्याटप्प्याने इतर तालुक्यांत टंचाई निवारणासाठी उपाययोजना राबविण्यात आल्या. मात्र, यावर्षी गेल्या वर्षीच्या तुलनेत टँकर उशिरा सुरू झाला आहे. वाई तालुक्यातील २ गावे आणि ३ वाड्यांसाठी प्रथम टँकर सुरू झाला. आतातर ४ जिल्ह्यांत टँकर सुरू झाला आहे. लवकरच आणखी काही गावांत टंचाई भासणार आहे.
चौकट :
वाई, माण, पाटण अन् कऱ्हाड तालुक्यांत टँकर...
वाई तालुक्यातील ३ गावे आणि ३ वाड्यांसाठी २ टँकर सुरू आहेत. यावर २९३१ नागरिक आणि १००५ पशुधन अवलंबून आहे. मांढरदेव परिसरातील ही गावे आहेत. माण तालुक्यात १ गाव आणि ५ वाड्या तहानलेल्या आहेत. यासाठी १ टँकर मंजूर आहे. वारुगड अंतर्गत पाणीपुरवठा सुरू आहे. पाटण तालुक्यातील आंब्रुळकरवाडी (भोसगाव), चव्हाणवाडी, नाणेगाव येथे टँकर सुरू आहेत. येथे एका टँकरद्वारे पाणीपुरवठा सुरू आहे. त्याचबरोबर कऱ्हाड तालुक्यात वानरवाडी आणि बामनवाडीसाठी टँकरद्वारे पाणीपुरवठा होत आहे. शासकीय २ टँकरने पाणीपुरवठा करण्यात येत आहे. १९४९ नागरिक आणि ९६८ पशुधन टँकरवर अवलंबून आहे.
.........................................................................