फलटण : दोन वर्षांपूर्वी झालेल्या भांडणाच्या कारणावरुन दुचाकीची मोडतोड करुन एकास तलवार, कुऱ्हाड व रॉडने मारुन गंभीर जखमी करण्यात आले. याप्रकरणी फलटणमधील भीमनगर येथील चौघांविरोधात फलटण शहर पोलीस ठाण्यात गुन्हा नोंद झाला आहे.
याबाबत फलटण शहर पोलीस ठाण्यातून मिळालेली माहिती अशी की, चंद्रकांत बाळू भोसले यांचे दाजी नितीन अहिवळे यांचे व रोहित अहिवळे यांचे गाडीच्या धडकेवरुन दोन वर्षांपूर्वी भांडण झाले होते. या कारणावरुन मंगळवार, दि. १९ रोजी दुपारी साडेबाराच्या सुमारास चंद्रकांत भोसले यांच्या घरासमोर भीमनगर येथे नितीन अहिवळे यांची दुचाकी फोडण्यात आली. याप्रकरणी भोसले व अहिवळे हे याबाबत विचारणा करण्यास गेले असता भीमा विलास अहिवळे, रोहित विलास अहिवळे, विलास नामदेव अहिवळे, दत्ता दिलीप खलाटे (सर्व रा. सरकारी दवाखान्याच्या पाठीमागे भीमनगर रविवार पेठ फलटण) यांनी आपापसात संगनमत करून चंद्रकांत भोसले व त्यांचा भाऊ सूर्यकांत भोसले, दाजी नितीन अहिवळे व भोसले यांची आई शर्मीला भोसले यांना जीवे मारण्याच्या उद्देशाने तलवार, दोन कुऱ्हाडी, लोखंडी रॉडने मारहाण करून गंभीर जखमी केले. याप्रकरणी भीमा अहिवळे, रोहित अहिवळे, विलास अहिवळे, दत्ता खलाटे या चौघांविरोधात गुन्हा नोंद करण्यात आला आहे. पोलीस उपअधीक्षक तानाजी बरडे तपास करत आहेत.