पीरवाडीत युवकावर सत्तूरने हल्ला

चौघांवर गुन्हा : दुचाकीच्या कारणावरून घडला प्रकार

सातारा : येथील पीरवाडी चौकात ‘दुचाकी हळू चालवत जा,’ असे म्हटल्याच्या कारणावरून एका युवकाच्या डोक्यात सत्तूरसारख्या हत्याराने हल्ला करण्यात आला आहे. याप्रकरणी पीरवाडीच्या चौघांजणांवर गुन्हा नोंद झाला आहे. दरम्यान, जखमी असणाऱ्या विजय कालिदास जगताप याच्यावर जिल्हा रुग्णालयात उपचार सुरू आहेत. याबाबत पोलिसांनी दिलेली माहिती अशी की, गुरुवार दि. १० रोजी सायंकाळी साडेसातच्या सुमारास विजय जगताप (वय २३, रा. उत्तेकरवाडा, पीरवाडी सातारा) हा युवक त्याच्या दोघा मित्रांबरोबर घरी पायी जात होता. यावेळी सिद्धिकी जलालुद्दीन खान (रा. पीरवाडी) हा विजयच्या समोरून दुचाकीवरून येऊन जवळून गेला. पुढे जाऊन खान याने दुचाकी थांबविली. त्यावेळी विजयने माघारी वळून पाहिले. त्यामुळे खानने विजयला ‘रस्त्यातून बघून चालत जा,’ असे सांगितले. त्यावर विजयने खानला गाडी हळू चालविण्यास सांगितले. यामधून दोघांत कुरबूर वाढली. त्यावेळी खानने विजयला बघून घेण्याची धमकी दिली.रात्री साडेआठच्या सुमारास सिद्धिकी खानबरोबर काहीजण आले. त्यांनी ‘चौकात बोलूया’ म्हणून विजय व त्यांच्या मित्रांना बोलावून घेतले. पीरवाडी चौकात ‘गेल्यावर उलटा का बोलतोस’ म्हणून विजय व त्याच्या मित्राला मारहाण करण्यात आली. यावेळी विजयच्या डोक्यात सलमान मुजावरने सत्तूरसारख्या हत्याराने वार केला तर त्याचवेळी कोणीतरी फरशीने विजयला मारहाण केली. यावेळी आरडाओरडा झाल्यानंतर संशयित पळून गेले.याबाबत विजय जगताप याने तक्रार दिली आहे. त्याच्या तक्रारीनंतर सिद्धिकी खान, तन्वीर शेख, इजाज काझी आणि सलमान मुजावर (सर्व रा. पीरवाडी) यांच्यावर गुन्हा नोंद झाला आहे. यामधील दोघांना अटक करण्यात आली आहे. (प्रतिनिधी)