लोकमत न्यूज नेटवर्क
सातारा : सातारकरांची सुरक्षा अबाधित राहावी, यासाठी पालिका व पोलीस प्रशासनाच्या वतीने शहरात सीसीटीव्ही कॅमेरे लावण्यात आले; परंतु ही यंत्रणा फार काळ तग धरू शकली नाही. ठिकठिकाणचे सीसीटीव्ही कॅमेरे अनेक महिन्यांपासून बंद असून, ते केवळ शोभेपुरतेच उरले आहेत.
सातारा ही ग्रामीण भागातील नागरिकांची मुख्य बाजारपेठ आहे. विविध शासकीय कार्यालो, शाळा व महाविद्यालय, बॅँका तसेच शिक्षण संस्थांची मुख्य कार्यालये शहरात असल्याने जिल्ह्यातील नागरिकांची येथे सतत ये-जा सुरू असते. नागरिकांच्या सुरक्षेसह चोरी, दरोडे, मारामारी अशा गुन्ह्यांवर अंकुश लावण्यासाठी पालिका व पोलीस प्रशासनाने शहरातील रहदारीच्या ठिकाणी दोन वर्षांपूर्वी सीसीटीव्ही कॅमेरे लावले. प्रारंभीचे काही महिने ही यंत्रणा उत्तम पद्धतीने सुरू होती. मात्र त्यानंतर एकापाठोपाठ एक सर्वच सीसीटीव्ही बंद पडले.
लॉकडाऊनच्या कालावधीत शहरात चोरी तसेच तसेच इतर गुन्ह्यांचे प्रमाण पूर्णत: आटोक्यात होते. मात्र, लॉकडाऊन शिथिल झाल्यानंतर अशा घटना हळूहळू वाढू लागल्या आहेत. महिलांच्या सुरक्षेसह भुरट्या चोरांवर वचक ठेवणारी ही यंत्रणाच कुचकामी ठरल्याने सुरक्षेचा प्रश्न पुन्हा ऐरणीवर आला आहे.
(चौकट)
पालिकेकडून केवळ घोषणा
सातारा शहर सुरक्षेच्या कक्षेत आणण्यासाठी पालिका प्रशासनाकडून सीसीटीव्ही कॅमेरे लावण्याची घोषणा करण्यात आली. गतवर्षी फेब्रुवारी महिन्यात झालेल्या अर्थसंकल्पीय सभेतही हा विषय चर्चेस आला होता. सीसीटीव्हीसाठी पाच लाखांची तरतूदही करण्यात आली. मात्र, आजतागायत हा विषय पुढे सरकलाच नाही.
(चौकट)
येथील यंत्रणा बंद
शहरातील कमानी हौद, देवी चौक, मोती चौक, मंगळवार तळे मार्ग, प्रतापगंज पेठ, राधिका चौक येथील सीसीटीव्ही कॅमेरे अनेक महिन्यांपासून बंद अवस्थेत आहेत.
(कोट)
सातारा शहराची नुकतीच हद्दवाढ झाली आहे. त्यामुळे शहरासह वाढीव भागाच्या सुरक्षेची जबाबदारीही पालिकेच्या खांद्यावर आली आहे. पोवई नाका, शाहू चौक, मोती चौक, राजवाडा यांसह सहा ठिकाणी पालिकेकडून सीसीटीव्ही कॅमेरे लावण्यात येणार आहे. लवकरच या कामास प्रारंभ होईल.
- किशोर शिंदे, नगरसेवक
फोटो : ०६ जावेद १७ - मोती चौक
०६ जावेद १८ - नगरपालिका
०६ जावेद १९ - केसरकर पेठ